Na lulu le ao o le alii faipule o Safata le afioga Palusalue Faapo II, ma faamatala lona faateia tele i tala ua salalau ma lipotia, ua taua ai se finagalo o se tasi o afioaga o le itumalo o Lefaga ma Faleaseela i le tatau ona tauva lo latou faipule mo le HRPP i le palota o le tausaga fou.
E faapea se molimau o le fono a le afioaga na faia i le Aso Faraile 12 o Fepuari 2010 na tuuina atu ai le finagalo lea a o iai le sui faipule le afioga Le Mamea Ropati.
E lei faaalia se finagalo o Le Mamea Ropati e tusa ai o lipoti ua faailoa ai lea tulaga. Sa taumafai atu mo le fia maua o le faipule ae sa le manuia.
O le salalau ai o lipoti ma tala i le manao o le nuu o le faipule e tauva mo le HRPP, ua faateia ai le afioga Palusalue Faapo II.
“O le tolu vaiaso talu ai sa ma feiloai ai ma Le Mamea ma faatau i ai le manao o le matou vaega (Tautua Samoa) e avea ma se isi sui tauva.
O lana tala mai e le toe fia tauva i le HRPP ua tele tausaga o tele i ai ana faamatalaga a o avea ma faipule o le Itu Agai”… na saunoa mai ai Palusalue.
O le afioga Le Mamea Ropati, sa taitai i le vaega faaupufai o le SDUP, lea sa taitai ai i le Itu Agai i le amataga o le paeaiga o loo iai nei a le Palemene, peitai e lei atoa se tausaga o le paeaiga fou ma tuanai atu le palota tele o le 2006, ae foua lana taitaiga e le sui taitai ma nisi o faipule o le pati ma faamavae ai loa.
Lana faamavaega lea na aveesea ai ma lona toe avea ma faipule e lagolagoina lea vaega faaupufai, ae ua tutoatasi e oo mai i le taimi nei.
“Sa ma feiloai lelei ma fai mai, e le suia lona tauva i le matou pati ae le fia tauva o se tutoatasi”, o le toe faaopoopo mai lea o Palusalue Faapo II.
Ua faailoa mai e Palusalue o loo lavea le suafa o Le Mamea Ropati i le latou lisi o sui faatutu mo le palota o le 2011 ma o lona talitonuga o loo tumau pea ia latou tapenaga mo lea faigapalota tele a le atunuu.
O le masua mai i fafo o lenei mataupu ua faaalia ai e nisi o faipule tutu toatasi le faateia foi o latou, ae o le tatalaina o le ofisa o le Tautua Samoa i le tausaga na tea nei na auai le sui faipule o Lefaga ma Faleaseela.
