E onoselau avanoa ua fuafua le Malo o Niu Sila ole a faaopoopo i galuega faavaitaimi ma o Samoa le tasi o atunuu ole a faamanuiaina i avanoa faaopoopo e pei ona faailoa e le Minisita oloo iai le vaaiga ole polokalame o tagata faigaluega faavaitaimi mai Samoa le afioga Lautafi Fio Selafi Purcell. “Ua ou faalogo iai ole a maua nisi avanoa faaopoopo ma ose tulaga lelei mo nai o tatou tagata oloo maua seleni i nei galuega”.
Faaalia foi e Lautafi o lana malaga talu ai nei na asiasi ai i tagata faigaluega faavaitaimi mai Samoa oloo galulue i Niu Sila na ia fautuaina ai le tatau ona usiusitai ma galulue lelei aua e 3 afe tagata oloo ile lisi ole au faatalitali. “Ua uma ona ave iai le upu fautua e leai lava se avanoa e toe maua e se tagata o latou pe a le usitai aua oloo toatele tagata oloo fia maua ia avanoa faigaluega”. Ole masina o Mati oloo fuafua e asiasi mai ai i Samoa le Palemia fou o Niu Sila o Jacinda Ardern ma nisi o Minisita o lana faigamalo soofaatasi. Oloo iai le matega ole avanoa lea faatoa faamautu ai avanoa faigaluega faaopoopo mo galuega faavaitaimi. Ua faaalia e Lautafi oloo maualuga le tauleleia o tagata Samoa e i latou e ana galuega ole faigaluega malolosi ma e lelei foi amio ma tulaga uma oloo faatino ai a latou galuega.
“Ole isi tulaga taua lena ole tausaafia oo tatou tagata ma ia talosia ia aveave a’i ai pea lea tulaga lelei aua ole tele foi lea ole manaomia o nai o tatou tagata e galulue ma maua ai seleni mo le atinae o nai o latou aiga i Samoa”. Ose tasi o laasaga lelei ua talia e kamupani e ana faatoaga i Niu Sila oloo faigaluega ai tagata Samoa ole aveesea lea ose seleni mai totogi o tagata mo a latou saofaga ole NPF i Samoa.
Na saunoa Lautafi ini fesili a tusitala ole tasi lea itu taua i galuega nei aua a foi ma tagata ua maea o latou taimi galulue ae oloo iai se seleni ile NPF e faaauau ai pe a maua se isi galuega i Samoa. Ole tasi itu lelei ole saofia ai o i latou i faamanuiaga a le NPF e le gata o nonogatupe ae o meaalofa tupe pe afai ae maliu e maua lea faamanuiaga e fanau ma aiga.
“O lea foi e silasila le Malo ia maua ni nonogatupe mo latou nei pe a foi mai e fai ai se isi pisinisi e maua a ai pea tupe e tausi ai o latou aiga pe a le toe maua le avanoa i galuega faavaitaimi.” O galuega i Ausetalia na faaalia e le Minisita le afioga Lautafi oloo lelei foi ae ole numela o tagata faigaluega mai Samoa oloo taoto ai pea se talosaga e silasila iai lea Malo pe toe maua se faaopoopoga.
