E oo mai le taimi o tapenaga mo le Aso Sa pa‘epa‘e poo le Lotu Tamaiti o lenei tausaga, a ua nofo malamalama foi ma le fiafia nisi o fanau ina ua latou maua faamaoniga o a latou tulaga i suega a Aoga Aso Sa sa feagai ma i latou.
O nisi aulotu sa latou faatāuaina lava taumafaiga a fanau ma fai ai lava a latou laugatogi i totonu o a latou aulotu.
O le Aso Toonai la na saunia lelei ai e le faalapotopotoga o Aoga Aso Sa Tuufaatasi a le NZSSU (New Zealand Sunday School Union) se mafutaga matagofie na faatāuaina ai taumafaiga a fanau mai aulotu eseese o loo auai i totonu o le faalapotopotoga lea i se laugatogi faapitoa mo le tulaga muamua, lua ma le tolu mai le vasega faataitai i le vasega 14 (grade 1-14).
E ese lava lagona ma faalogona o le tino pe a oo mai i taimi faapenei, auā e leai se matua e lē mitamita ma faaali le fiafia e tusa ma le tali mai a fanau.
O aga masani lava e faailoa ai le loto fiafia ma le agaga faafetai tele i le Atua ona o ana faamanuiaga i fanau ma a latou taumafaiga.
I lea faamoemoe na maitauina ai le sola o le Aoga Aso Sa a le PIC mai Newton ma le tele o faailoga i le tulaga muamua poo le tulaga lua foi mai lava i le vasega muamua e oo atu i le vasega 14.
Vaaia lava le matua fai tama masani a nai mātua ma le alofa lagolago o aiga uma i lo latou taupati atu e faaula ma faafeiloai i fanau e momoli atu ai le faafetai e tusa ma tauiviga ma suesuega faalemafaufau i mataupu o le polokalame a le NZSSU.
O se polokalame lelei tele lenei e fai ma faamalosiau i nai fanau auā lava le faamoemoe ina ia ola fanau ia Keriso. Saunoa se sui o le Komiti o le faalapotopotoga NZSSU o se fiafiaga sili lava o le faatupulaia pea o le fuainumera o Aoga Aso Sa o loo faaopoopo mai i totonu o le mafutaga, ma e faamoemoe foi e toe iai pea nisi faaopoopoga mai nisi aulotu i le lumanai.
