O le upu moni lava e pei ona ua silafia, e selesele lava le tagata ia e tusa ma si ana luluuga sa fai, a o le foi sa tele ana na lulu e faapena foi ona tele ana e selesele. O le polokalame a le Herbal Life na afua mai ai le fuafuaina o se luitau na faasavali i le 10 vaiaso mo le lusiina o pauna i le mamafa ma le faaitiitia o le tino lapo’a i totonu o le aai o Manurewa.
Ina ua faasalalauina lea luitau ma lea matatia lelei tele sa faapena ona taupati ane le toatele o tagata e fia auai ma fia faaaogaina lea polokalame e fesoasoani aim o i latou lava. E tusa la ma le 32 tagata na resitaraina ma amataina ai loa lea faamoemoe taua, peita’I e oo mai i le po o le Aso Toonai na faia ai le laugatogi, ua toe na’o le 24 sui na fatiniina lea luitau ina ua faavaivai ma faamaamulu foi nisi o sui.
Ia e lei tuua ai la le tauiviga sa fai ma sa maitauina le matua nanau lava o sui ina ia maua se a’I ma ia maua se taunuuga lelei mo le tagata lava ia aua foi o se faataitaiga lelei tele lea polokalame mo nai o tatou tagata ma le faamoemoe autu e le gata ina maua ai le lusiina o le tino ma pauna, a o le silafia ma faaoloaina ai le malamalma i le tausiga faaauaua o le soifua ola maloloina lelei.
O lenei polokalamae sa faaaogaina lelei lava i ai ma le inuina o vai a le Herbal Life ma o se fesoasoani sili lea sa fai ma faamalosia’u i le tino ma le faaitiitia o le manao i tausami masani i aso taitasi. E manatu o se luitau sili lea ona faigata i le faagasologa o le 10 vaiaso aua foi ua masani lava i le routine o aso uma i meaai masani, peitai o lagona faaali o sui sa auai i le polokalame, o se matua fesoasoani sili mo le aiga lenei luitau.
O le saunoaga a le susuga ia Salu na ia faamaninoina ai le tele o lona fiafia faatasi ai ma si ona faletua ia Palolo, i le tele o lo laua suiga i le faalogona i le malosi faafouina i aso uma, o le fiafia ma le saoloto o le mafaufau mai le popole, o le sefeina o nisi vaega tupe mai le tele o meaai faatau ae o le fiafiaga sili o le mafai ona lusiina ai le tino ma le mamafa ma ua faapena foi ona fesoasoani tele mo lo laua soifua maloloina ina ua faaitiitia ai ma gasegase sa feagai ai i le tele o tausaga ua mavae.
O le susuga i le faifeau o Amosa sa taitaia lenei polokalame ma le afiafi la o le Aso Toonai na faia ai le laugatogi ma faaumaina ai lea faamoeme.
O le susuga Rv. Pastor Sepi sa na taitaia lea laugtogi i se sauniga lotu, ma na faapena ona saunoa faafetai ai Sepi ma momoli le faamalo ia Amosa mo le faataunuuina o lenei luitau mo tagata lautele i totonu o Manurewa.
O le tagata la na mauaina le manumalo ina ua lusiina le tele o pauna i le mamafa o le tino o le tina ia Doreen na ia maua le faailoga e $500.00. Tulaga lua na faamanuiaina ai le tina ia Monise Lua e $300.00, ao le tulaga tolu o le tina ia Malae e $200.00, a o le lusi o le tino i sulugatiti (waist) na mauaina e le tina ia Elesi.
Ia ua mae‘a nei la le luitau muamua lenei ae o lea ua toe foufou mai le challenge lona lua e amataina i le masina o Iuni, a o lea ua sponsor ai e le Susuga i le faifeau Rev. Pastor Sepi ma lona faletua ua la ofoina mai o le $1000.00 mo le faailoga mo le tulaga muamua auā le polokalame ua faataatia mai. Faafetai faafetai tele lava.
