Tamaiti Year 11 ma le Year 12 mai aoga maululuga a Kuiniselani SHS na tuufaatasi i le camp a le Iunivesite o Griffin

O le fitu (7) ai lenei o tausaga talu ona faagasolo mai le Camp masani ua igoa o le LEAD (LEGACY, EDUCATION, ACHIEVE, DREAM), lea na amata mai i le Aso Gafua aso 13 e oo atu ile aso 15 o Me o le tausaga lenei. O se polokalame ua mautinoa le lelei ona fuafuaina ma tapenaina aua e faatupe uma lava e le Iunivesete a Griffith, o se tasi foi o Iunivesete i Kuiniselani e maoa’e le toatele o tamaiti Pasefika faapea alo ma fanau Samoa na a’oa’oina ai. O le tele foi o nei plokalame e faatautaia e alo ma tama fanau a Samoa.

O le ‘auga tonu o lenei mafutaga, ina ia faaleleia atili ma faatumauina tomai ile galulue faatasi o tamaiti, saunia ni auala tau lagolago o fesootaiga, lagolago i auala e atia’e ai le tagata lava ia, faavae ni matati’a ma ni matata ma iai le naunau e ausia ai a’oga maualuluga me faalautele ai le ola a’oa’oina, m ia tap’ue le agaga mitamita i lau aganuu.

E 10 A’oga maualuluga na auai i le faatasiga lenei e aofia ai Beenleigh SHS, Mabel Park SHS, Marsden SHS, Kingston SHS, Woodridge SHS, Upper Coomera, Ipswich SHS, Keebra, Calamvale Community College,  ma Glenala SHS, ma e ova atu ile 100 ma ona tupu tamaiti mai le Year 11 ma le Year 12 na auai, ma a’oa’oina mai ai ni lesona sili ona taua i lenei faatasiga. 

A tuu i le loloto, o se tasi lea auala o loo maualuga ai le faalauiloa,  ae sili ona latalata ai fesootaiga a le Iunivesete a Griffith ma tupulaga a le Pasefika i A’oga maualuga (State High Schools) i Kuiniselani. 

O lenei Camp ose faitotoa lea e faaosofia ai le naunautaiga i tamaiti ina ia faalautele le silafia ma le  iloa e i’u atu ai ise  taunuuga lelei e agai iai i le lumanai, nai lo le gata mai i se galuega e le o faamalieina ai ina ua mae’a High Schools. 

E maoa’e foi le maualuga o le lava saunia ma le lelei tapenaaga  e ala mai i faauluuluga aemaise lava le tamaitai Samoa ia Emma Tanuvasa (Program Director), faapea le Mentors & Griffith University Student Diversity and Inclusion, Student Services mo lenei avanoa faa’auro ua musuia ma faamalosia ai tamaiti e mafuta atu ai ma a’oa’oina mai ai ni lesona aoga mo le olaga, aemaise le faalauteleina o le soifua aoaoina.

O le tele foi o alo ma tamafanau a Samoa o loo galulue e atina’e fesootaiga a matua ma fanau i a’oga nei, e momoli ai le agaga faafetai aua o i latou nei o loo faafaigofie ai ona silafia ai e matua Samoa ma le Pasefika le tele o vaega e le o mafai ona silafia, aemaise lava le una’ia lea o fanau ina ia mautinoa ia faaaoga tatau tupe a matua o loo faaa’oa’ooga ai latou. 

E le falala fua le niu, e le o faia fua la nei taumafaiga, e le gata ose avanoa e faamasani ai fanau aoga,  ae ia mautinoa e iai se tāua mo tupulaga Samoa ma le Pasefika.

Bruce Manu Sione ma tamaiti Year 11 ma le Year 12 mai aoga maualuluga a Kuiniselani SHS na tuufaatasi i le camp a le Iunivesite o Griffin