Lata 50 pasene aofaiga o fanau Samoa aafia i le kanesa

Ua faailoa i ni faamaumauga mai le Matagaluega o le Soifua Maloloina, le lata i le 50 pasene o fanau i lo tatou atunuu mai le pepe e oo i le 15 tausaga le matutua, ua aafia i le gasegase o le kanesa.
O ia faamaumauga na faailoa i se faalauiloa a le Sosaiete o le Kanesa i Samoa, le Samoa Cancer Society e pei ona saga faalauiloa ai fautuaga ma tima‘iga mo le silafia e le atunuu o le tāua o le saili o se fomai e siaki ai fanau.
E faailoa foi nei faamaumauga a le soifua maloloina e ala i se suesuega na faia i le lima tausaga mai le tausaga e 2007 i le 2011, ae lipotia e le sosaiete a le kanesa le uma ai o le ola o se pepe i le kanesa e mafua ona o le tuai ona auina atu e vaai se fomai.
O se tasi lenei o gasegase ua toatele tagata i lo tatou atunuu ua aafia ai ma ua maliliu ai foi. Peitai ua faaalia e le Sosaiete o le Kanesa i Samoa, e mafai ona togafitia pe a vave iloa auga e pei o le tiga faalausosoo o ponaivi o le tino, suati ma le faasolo ina paee aemaise o ni patu poo lump e oso i le nofoaga ma isi vaega o le tino.