Ua lapataia e le Failautusi Aoao o le Ekalesia Faapotopotoga Kerisiano Samoa, taitai o se faalapotopotoga o tagata sa lolotu i le EFKS ae ua o ese ma faatū se latou mafutaga i Niu Sila ua faaigoaina o le New Vision Charitable Trust Board, ina ia taofia lo latou faaaogā o le igoa o le ekalesia EFKS.
Faaalia o nisi o taimi e faaaogā ai le igoa o le ekalesia i faasalalauga a lea mafutaga. I se finagalo o le Failautusi Aoao o le EFKS i se lipoti i luga o le nusipepa o le Samoa Observer o loo faaalia ai e Dr Iutisone Salevao lea mafutaga ma le tuualalo e taofi, ae afai e lē usitaia o le a oo loa le mataupu i le tulafono ma le faamasinoga.
O lea ua gaioi nei le pulega o le ekalesia e lesitala faaletulafono le igoa o le ekalesia ina ia avea o sana meatotino, o se faiga lea e lē toe mafai ai ona faaaogā e soo se tasi poo ni mafutaga o tagata lotu kerisiano aemaise lava i latou ua o ese mai le ekalesia.
E leai se eseesega o le mataupu lenei ma le tusi a le Ekalesia na ave i le Fono a Ekalesia Soofaatasi i le tausaga ua mavae, na fautuaina ai le taofia o le lesitala o se tasi o ekalesia ua faaigoaina o le LMS Toe Fuata‘ina ona o aafiaga foi i le igoa LMS sa iloa muamua ai le ekalesia lea ua suia le igoa i le Ekalesia Faapotopotoga Kerisiano Samoa poo le EFKS.
