O le manatu o le toatele o tagata Samoa e saogalemu lava lo tatou atunuu ua amata nei ona suia ona o le sola ai o se alii Sinamoga i le vaiaso na tea nei ma se taavale na alu atu o tu i luma o se faleoloa i Lotopa.
O le faleoloa o Siaosi Mah Yen i Lotopa na paka ai le taavale a Peti Tauiliili ae agai i totonu e fai sana faatau.
Na tuu lava le ki i le taavale faapea ai ma lona atalii e lima tausaga le matua. Faaalia e le Ofisa o Leoleo, e foi mai le tamā mai i lana faatauga ua leai se taavale, leai ai ma le atalii lea sa i totonu.
O le sailiga mulimuli ane na iloa ai o le taavale na gaoia o loo i tua o le Fale o le Malo i le Eleele-fou.
E maua atu lava le taavale o iai le tamaititi lea e lima tausaga le matua. Ta‘ua e Leaupepe Fatu Pula, o le alii lea ua taofia i le sola ma le taavale ma faaaogā e aunoa ma se faatagaga e mai i le afioaga o Sinamoga, e 23 tausaga le matua ma e suafa ia Faamasino Enoka.
Faaalia e Leoleo ai na alu ane lava le alii iloa atu e leai se avetaavale ae o loo pipii le ki o le taavale i le foeuli, oso sa‘o lava i totonu ma alu ese loa e ui o loo iai le tamaititi i totonu.
O le faafetai a le toeaina o le aiga e ana le taavale o Tauiliili Frank Cordtz ona na maua atu le taavale o iai lava si ona grandson – ma e faafetai o le leai o se tulaga faaletonu na tulai mai i le tamaititi.
O le masani lava lea a tagata Samoa e pei foi ona toatele ua talatalanoa ai i le tulai mai o lea ituaiga gaoiga, o le tuu o le ki i totonu o le taavale ae agai i faleoloa ma fai faatauga e aunoa ma se manatu e ono ave e se isi le taavale.
O le tulaga foi lea e iai le tuu o fanau i totonu o taavale – ae o lea ua manino nei, e lē o toe saogalemu Samoa e pei ona sa sau a‘i ma ua toatele foi lava tagata ua vaavaai i le gaoia o taavale.
O le tulaga matautia lava ua avatu ai lava ma fanau laiti o loo iai i totonu o ia taavale.
O le vaiaso lenei e tulai ai le alii o Faamasino Enoka i luma o le faamasinoga e tali atu i moliaga o lona faia o lenei solitulafono. O se gaoiga muamua lea ua aafia ai le ave o se taavale ma avatu ai lava ma se tamaititi o loo taofia ai i totonu o le taavale.
“E tatau lava ona mataala le atunuu, a o ese ma le taavale, i soo se taimi tusa lava pe puupuu le taimi e tuua ai le taavale, ave le ki, ma e tatau foi lava ona manatua, e lē saogalemu le tuu o fanau i totonu o taavale ae o ese, e leiloa lava mea e tutupu,” o se faaaliga lea a Leaupepe Fatu Pula.
