Lapatai Leoleo i le saogalemu mai faalavelave

I le vaiaso mulimuli o Iulai ma le vaiaso muamua o Aukuso, ua toaono lava tagata ua maliliu i ogasami.

O le toafā o ia tagata o le fanau e 16 ma lalo ifo le matutua.
Na faaalia e le alii Komesina Lagolago o Leoleo – o le tele lava o taimi o le faatamala lava e mafua ai ona maumau soifua i le sami.
O le lua vaiaso talu ai e toatolu lava i latou na maliliu ai i ogasami o le atunuu.
O se tamā mai le afioaga o Afega na malemo i se faiva a nisi o le afioaga – e lei toe foi ane ai i uta ae na faato‘ā maua lona tino maliu i le aso na soosoo ai.

O le isi toalua o le fanau laiti na maua i tuafale ua malelemo ai. O le vaiaso na tea nei lea ua faamautu ai foi o se isi foi tautai o le afioaga o Lefagaoalii na maliu ina ua agai foi i se faiva i le amataga o le vaiaso ma nisi o taulelea o le afioaga peitai e foi ane isi tautai e lei foi mai lava lea alii.

Na toe foi i le sami i latou na fagogota faatasi ma le tama lea e 32 tausaga le matua ae na maua ai lona tino maliu ua malemo.

Faaalia e Leaupepe Fatu Pula o le isi maliu i le malemo i le vaiaso na tea nei o se tamaititi e 16 tausaga le matua mai i le afioaga o Magiagi na agai ma lona uncle ma lona tausoga la te tupulaga i se faiva i gataifale o le afioaga o Matautu-tai.

O le faamatalaga a Leoleo o lea tamaititi faato‘ā malemo i le taimi na agai mai ai i uta ina ua toe faliu atu lona tei ma lona uncle ua leai se isi ma taumafai loa e saili.

Na o ane foi tupulaga o le afioaga o Matautu-tai faapea Vaiala e tau saili ma na umi se taimi faato‘ā maua o ia ma taumafai ai e faaola peitai o ia taumafaiga na matuā faigata ona toe laveaia lea alii talavou ma na faamaonia lava i le falemai tele i Motootua ua uma lona ola ina ua momoli i ai o ia.

Talu mai le amataga o le tausaga ua silia i le toasefulu (10) i latou ua maliliu ona ua malelemo, ma o le fautuaga malosi lea ua faalauiloa nei e le Matagaluega o Leoleo ina ia mataala tagata uma auā o le tele foi o tagata o loo maliliu i le sami, o tautai peitai o loo tulai mai pea faalavelave faapea.

O le faamatalaga a Leaupepe Fatu, e tatau ona mautinoa le tulaga o le sami ma le fesuiaiga o le tau, ae mo fanau e nonofo latalata ane i le sami, e tatau lava i mātua ona mautinoa o loo saogalemu fanau.

O isi faalavelave:
E ese mai i ia lapataiga ua lāgā foi e le Ofisa o Leoleo le faigata tele o le faaeteetega o fanau ua lavevea i luga o alatetele. O loo ua to‘a mai se teineititi e ono tausaga le matua i le potu taofia mo gasegase tigaina le HDU i Motootua, ina ua mae‘a se togafitiga faatopetope i lona ulu. O se lavea na mafua mai ina ua palasi i le auala, ua taia e se taavale. Faaalia e Leoleo o le amataga o le vaiaso na tea nei na agai mai ai le teineititi lea ma nisi tamaiti aoga ua tuua aoga ma ua agai i o latou aiga i le afioaga o Aufaga.

O le va lea mai i le faleaoga i le fale na lavea ai loa ma āfaina lona ulu. Ua faafetaia e le aiga le laveaia o le ola o lea teineititi peitai o loo iai lava le popolega tele i le ono āfaina i le lumanai mai i ia manu‘a ona e ogaoga tele manu‘a o lona ulu.

O le taimi nei ua faamautu mai e leoleo ua faasolosolo manuia lea teineititi. E tulai mai lea faalavelave ae o loo faatautaia se fonotaga a sui o le Malo i afioaga taitasi, pulenuu ma sui tamaitai o le malo, atoa ai le Pulega o Taavale Afi a le Matagaluega o Eleele ma Felauaiga aemaise le Matagaluega o Tina ma Tamaitai, Atinae o Nuu ma Aga Fesootai i auala e mafai ona vaavaai i ai le atunuu i le puipuia o le fanau mai i luga o alatetele.

O le faamatalaga a Maulolo Leaula Tavita o le Vaega o Atinae o Nuu, o se faafitauli tele lenei o le lavevea o fanau a o agai atu i le aoga pe ua toe foi i aiga ona o le āfaina o soifua i taavale feoai i luga o le alatele.

Faaalia e Maulolo Leaula, o se fautuaga na sau sa‘o lava i le Palemia o le atunuu, Susuga Tuilaepa Lupesoliai Sailele Malielegaoi, ina ia vaavaai le Matagaluega i se auala e foia ai le tulai mai pea o faaalavelave faapenei i soo se itu o le atunuu.

O lea la ua amata ai faatalatalanoaga ina ia unai ai le sao o le Matagaluega lenei e ala i le saofaiga a Alii ma Faipule, o Komiti a Tina, o Pule ma Faiaoga aemaise Mātua o fanau, ina ia taofia le tulai mai pea o faalavelave ua maumau ai ola o fanau laiti.

O se faiaoga poo se sui o nei lālā uma ua galulue faatasi, ua saili nei ina ia fai lava ma o latou tiute le momoli o fanau i aiga ma le aumai ai o i latou mo a‘oa‘oga i aso uma, lea ua oo i ai talanoaga.

O le faamoemoe o le Matagaluega lenei o Tamaitai, Atinae o Nuu ma Aga Fesootai, ia iai se vaega o tagata o nuu uma e faamautu le latou puipuiga o fanau a o feagai ai ma a‘oa‘oga.