‘Matou te naunau e faaleleia le taaloga lakapi i Tutuila ae tatau ona malu le puipuiga o laufali.’… Papalii Tulouna Avia
O loo lagolago malosi le Iuni Lakapi aoao a Samoa i le atiina a’e o le taaloga i totonu o Amerika Samoa aemaise lava o le iuni lakapi a le teritori o loo taitaifono ai le afioga i le Kovana Sili Togiola Tulafono.
O le lagolago foi a le iuni faatina i Samoa o loo taulai i le faaofi atu o le iuni a Tutuila ma Manu’a i totonu o le IRB le pulega o le lakapi i le lalolagi e avea ai ma sui auai. Peitai o le lagolago e pei ona malaga ai alii laufali e faafoe taaloga i Amerika Samoa, ua tuta’ia ma ponatia i le fasia ai o se tasi o sui laufali o le sosaiete a laufali a le Iuni Lakapi aoao a Samoa le susuga Ponifasio Vasa.
Na tāpā se finagalo o le susuga Papalii Tulouna Avia o ia o le taiulu poo le manager o le sosaiete a laufali a le Iuni lakapi aoao a le atunuu. “E fai lava si faanoanoa tele i le tulaga ua tulai mai, ae e iai lava le naunautaiga e fesoasoani pea mo le atina’eina o le taaloga i le la itu o Samoa”.
Ua faaalia foi e Papalii Tulouna na logoina mai loa le faalavelave ua tupu ma le aafia o le soifua o se tasi o laufali, ona taloina lea o le latou fonotaga ma faia ai le faaiuga e taofia mo se taimi le toe malaga o ni laufali e faafoe taaloga a le Iuni lakapi a Amerika Samoa. “O le faaiuga lena ua matou faia ona o le fia puipuia o le saogalemu o le soifua o laufali, aemaise o lea e maua mai faamatalaga o tagata matamata ma le autaaalo na latou faia le faaoolima i le laufali”.
Ua faaalia e se sui o le iuni lakapi a Amerika Samoa le susuga Tau Toluono, o le taaloga i le va o le au lakapi a le afioaga o Nuuuli ma le ‘au malosi a tama tuai o Avele lea na latou se’iina le talita a le Kovana poo le taitaifono o le iuni a Amerika Samoa mai le ‘au a Nuuuli. O le molimau a le sui o le iuni a Tutuila ma Manu’a, e fai si umi o vaiaso o manumalo pea Nuuuli i le talita a le Kovana, ma o le isi mafuaaga lea o le tulai mai o le faaletonu ina ua faia’ina i le taaloga ma tama tuai o Avele.
E aafia foliga o le alii laufali o Ponifasio Vasa e pei ona molimau mai le susuga Tau Toluono, toe gau ma le pou o lona isu. Sa faia sona taotoga ma o loo taofia pea i le maota gasegase o le LBJ i Fagaalu.
O le pili atoa o le taotoga ma le taofia ai o le alii laufali mai Samoa mo togafitiga o loo totogi uma e le Iuni Lakapi a Amerika Samoa e pei ona faaalia e le sui o le iuni.
O se feiloaiga a tusitala ma le sui o le taaloga lakapi i atunuu o le Oceania le susuga Lefau Harry Schuster, se tasi o faipule o le itumalo o Vaimauga i Sisifo i le Palemene, na faaleo ai se faanoanoaga i le faalavelave na tupu. Peitai ua faaalia e Lefau i tusitala, e lē tatau ona avea lea faaletonu ma auala e taofia ai le avea o Amerika Samoa ma sui o le IRB.
Na pau le tulaga e ao ona silasila i ai le iuni a Amerika Samoa, o le faia o se faaiuga talafeagai i le ‘au a Nuuuli na mafua ai le faaletonu.
O loo iai le talitonuga e tauau ina faasā ma tapu ona toe auai lea aulakapi i le taamilosaga o lenei tausaga e avea ma faasalaga o le fasi o le laufali. E lei maua mai foi se lipoti i Amerika Samoa po ua molia nisi i le faia o le faaoolima.
