Lalomalava le aai aupito aulelei o Samoa

I le mae‘a ai o le polokalame o le faamatagofieina o aai ma maota, ua tulai mai ai le afioaga o Lalomalava i Savaii i le tulaga muamua i nuu tetele i totonu o le atunuu i le matagofie ma le mamā.

O se tasi lea o afioaga i le motu tele i Salafai, ua agai i luma lona atina‘e i nisi foi o faletalimalo ma pisinisi ua faatūina ai ma o le tulaga i le matagofie ma le mamā o lona aai ma maota lea ua faamanuiaina ai loa i le tulaga muamua mo lea faamoemoe a le Malo.

Mo le silafia, o le polokalame o le faamatagofieina o aai ma maota, sa faatino e le Matagaluega o tagata tafafao maimoa mai fafo (Samoa Tourism Authority-STA) i tausaga ua mavae. Peitai, na talosagaina e le afioga i le alii Palemia, Tuilaepa Lupesoliai Sailele Malielegaoi le Matagaluega o tagata tafafao maimoa mai fafo ina ia tuu atu i le Matagaluega o tina ma tamaitai, atina‘e o nuu ma agafesootai lea polokalame lea na amata ai loa lea faiga i le tausaga nei.

O le tuu atu o lea faamoemoe i le Matagaluega o tina ma tamaitai, o se manatu o le Malo i le faafaigofieina o galuega faatino ona o le vaega tonu lea o loo nafa ma mataupu a nuu. O aiaiga sa faia i tausaga ua mavae, e resitala muamua afioaga uma ona faatoa mafai lea ona tauva i lea tauvaga ma ua fai i ai e le Matagaluega o tina ma tamaitai se suiga e ala lea i le tatala o le avanoa i soo se afioaga ona o le naunau lava ina ia faaauau le faamatagofieina o afioaga uma.

Saunoa le afioga i le Minisita o tina ma tamaitai, Tolofuaivalelei Falemoe Leiataua o le taumafai pea o lea polokalame ina ia tumau le mamā o Samoa ona o se tasi lea auala e toatele ai turisi poo tagata tafafao maimoa mai fafo e tafafao i lo tatou atunuu. “O le vaega o tagata tafafao maimoa mai, o se tasi lea alatupe tele a le Malo ma e manaomia ai le galulue faatasi o le atunuu, auā o le galuega fai faatasi a tagata uma,” o se saunoaga lea a le alii minisita.

O le amataga o le tausaga i le masina o Ianuari, lea sa amata ai asiasiga mo lea polokalame seia oo mai i le masina lenei, lea ua filifilia ai loa afioaga ua tulaga muamua. Pau le aiaiga na faamamafa e le Matagaluega, o le auai lea o afioaga i le polokalame amata mai ia Ianuari seia paia Tesema ae lē o le toe resitala mai i se masina mulimuli ane.

Sa vaevae i vaega e lua, o afioaga tetele ma afioaga laiti lea ua tulaga muamua ai Lalomalava i nuu tetele ae tulaga muamua Vaisa‘ulu i nuu laiti. E 31 afioaga o Upolu ma Savaii na maua faailoga faapitoa, faatasi ai ma le 30 afioaga o Upolu ua agai i luma le taumafai ma le 15 mai Salafai i afioaga lava ua siitia le taumafai i lea polokalame.

E $4000 tala le faailoga na maua e Lalomalava mo lea faamoemoe ae o afioaga uma na maua faailoga faapea afioaga sa mafai ona auai na maua uma faailoga tupe. E talitonu le Matagaluega, o le a agai i luma le polokalame ma e faamoemoe foi i le lagolago a le atunuu e faigofie ai le faatinoga o lea vaega tāua o le atina‘e o le atunuu.