Ua pa‘ū le numera o talosaga ua aoina mai i tagata i Samoa nei aua le tau sailiga o nofomau ma avanoa faigaluega i Niu Sila. O le se‘i o le Quota lea na faatautaia i le faaiuga o le vaiaso na tea nei ma o se taumafaiga na molimauina ai ua foliga mai ua tuuitiitia le numera o tagata Samoa ua oo atu a latou talosaga i totonu o le taimi faatulagaina ole se‘i.
E 534 le numera o talosaga na ta‘ua e le ofisa o femalagaaiga a Niu Sila ua avatu i lo latou ofisa i lenei tausaga. E 1,100 le aofai o talosaga e talia e Niu Sila mai i Samoa lava ia i tausaga taitasi.
O lona uiga a lē atoa le 1,100 e agai atu le Ofisa o Niu Sila i lo latou ofisa i Aukilani ma Ueligitone ma saili ai loa ia avanoa i tagatānuu o Samoa e lei sili aso e nonofo ai i Niu Sila ae o loo faatali foi ni talosaga na o latou faatautaia mo ia avanoa nofomau.
E lē talia ni talosaga mai i nisi ua faapea ona sili aso (overstayers) o nonofo ai i Niu Sila pe ua i Samoa foi ma ua tuli faasalaga i le sili aso na tatau ona nonofo ai i lea atunuu.
Ua toatele ua agai i le avanoa lea ua savali nei i le lima tausaga o faatautaia i le va foi o Samoa ma Niu Sila lea e galulue faavaitaimi ai i latou e filifilia mai i Samoa nei i faatoaga o togalaau aina i totonu o Niu Sila. O avanoa ia ua ta‘ua i lalo o le polokalame o le RSE (Returned Seasonal Employer) e taiono masina i le tausaga atoa e galulue ai tagata Samoa mai i latou mai isi atunuu o le Pasefika i nei togalaau aina. O le tausaga lenei ua faalautele atu nei avanoa i Ausetalia ma e foliga mai ua toatele i latou ua agai i avanoa nei nai i lo le agai e nofomau i Niu Sila.
E ui o lea, o le numera o talosaga o le tausaga lenei ua aofia ai tagata e to‘a 14,000 – o se numera tele lava lea pe a fuafua i talosaga nei ua amata nei ona tatala le faatautaiga. O le faaiuga o le tausaga e tatau ona oo atu i ai ua mae‘a ona faamautu uma pepa faigaluega ma isi aiaiga o le Quota ma agai loa le toatele ua talia a latou talosaga e faamautu i Niu Sila. Faaalia e le alii Hai Komesina o Niu Sila i Samoa, o le faamanatuina o le 50 o tausaga o Samoa i lona tutoatasi ua avea ai le se‘i o lenei tausaga ma faatasiga faapitoa ma ua ese foi le faatāuaina ona o se faailoga lenei o le faaauau pea o le va galulue faatasi ma le vavalalata o atunuu e lua. Na saunoa le alii Palemia le Susuga Tuilaepa Lupesoliai Sailele Malielegaoi, e ui lava i le mafana o mafutaga a Samoa ma isi atunuue pei o Saina, Ausetalia, Amerika ma isi, e ese lava le vaai a Samoa i lana mafutaga ma Niu Sila ona o le leva ma ua tele le fesoasoani ua vaaia i le amata mai ai o le tutoatasi o Samoa mai i le vaaiga a lea atunuu, i le itu lea e ui ua sa’oloto Samoa, ae e le o mamao ese lava le vaavaai a Niu Sila i auala e mafai ai ona aapa mai e fesoasoani pea i lenei motu o le Pasefika.
O lea foi la ua faamautu i le Quota, o se feagaiga ua faafaigofie ma ua toatele tagata Samoa e maua ai avanoa e nofomau ma galulue ai i Niu Sila. Ua na o Samoa lava e iai lea ituaiga feagaiga ma Niu Sila.
