Lalau e Tuilaepa le lē mafaufau o Palusalue

O le tausaga lenei o le a vevela ai polokiki o upufai o le Malo o Samoa ona o le tausaga a sau 2011, le isi faigapalota tele o le a toe sailia ai ni sui faipule o itumalo i le Palemene. O le a mautinoa le siisii o le tai i felafolafoaiga faapolokiki e le gata i totonu o le maota fono, ae o fafo mai o le Palemene.
E faapena taualumaga amata o le tausaga a le fono aoao i lena vaiaso ua mavae, ina ua talanoaina le tala faaopoopo muamua o le Tupe e pei ona faatatauina ai se vaegatupe e tusa ma le $78 milion mo galuega fesoasoani mo aiga na aafia i le sunami, aemaise e toe fausia ai nisi o vaega taua na faaleagaina e pei o auala tetele, suavai taumafa ma le eletise.
O se tasi o tulafono tāua sa talanoaina e le palemene o le tulafono mo le aoina o soo se ituaiga o otaota mo le puipuia lelei o le siosiomaga o le atunuu, lea na faaali ai le finagalo o se tasi o faipule o Safata, le Afioga Palusalue Faapo II.
Saunoa le sui faipule i le tāua o le tulafono ae sa ia fesiligia le usugafono toatele a Samoa na malaga i le fono a le lalolagi i Copenhagen i le atunuu o Denmark, lea sa ia faaalia na foi fua mai e leai se taunuuga lelei mo le lumanai manuia o siosiomaga o atunuu laiti e pei o Samoa. Sa ia lagolagoina foi le vaegatupe e selau piliona o tupe ua ofo mai atunuu mauoloa e fesoasoani ai i atunuu laiti mo le puipuia o o latou siosiomaga aemaise le siitia o le sami.
Faaalia e Palusalue e le taitai ona lava ia tupe, peitai o lana lafoga lea na tulai ai le alii Palemia, Susuga Tuilaepa Lupesoliai Sailele Malielegaoi, ma ia lalau le lē mafaufau soo o le sui a faipule.
“Faapefea ona talanoa mai i le faapefea ona faatino nei mea ma le selau piliona e le taitai lava”… na faauilavea ai le alii Palemia. “Lau afioga i le Fofoga Fetalai, o le uiga o la‘u tala faafetai ua maua seleni ae o le auga o le fono lea ia saini malo tetele i le convention lea…” E lei maea le saunoaga a le sui faipule o Safata ae toe faauilavea le taitai o le Malo. “Tasi la lea mea e le o malamalama ai ae o lea ua uma ona saini le accord e Malo, ou te leiloa la poo le a le mea lea e talanoa i ai, o lea ua uma ona saini Malo tetele”, na saunoa ai Tuilaepa.
E lei solomuli ai Palusalue i lana finau ona na ia folasia i le maota fono, e ese le ioe, ese le saini lelei o taitai o Malo. Na avea lea vaega o lana folasaga ma se isi avanoa e faauilavea ai le Palemia i le faasa‘oina o le saunoaga a le sui a faipule.
“Lau afioga i le Fofoga Fetalai, o le mea tonu lava lea e ta‘u o le faatautala, o le tu mai e tautala i le mea e lē o malamalama i ai. Se o le a tauau ina o lua ma le lē mafaufau ma le lē migao, ua fai soo”… o le faauilavea a le Palemia na saunoa i ai.
“E te faalogo atu a faavalevalea lou taofi ae faaali soo mai a”. O le finagalo o Palusalue e lei mafai e taitai o malo tetele e pei o le Peresitene o Amerika o Barrack Obama ona logosaia le autu o le savali a malo laiti.
Peitai e ui ina faapea e lei ausia le autu o le finau a malo laiti, ae o le faaiuga na taunuu i ai lea fonotaga tele a taitai o le lalolagi ua lagolagoina e Samoa ona o le amataga lea o taumafaiga mo le fia puipuia o le lalolagi mai suiga tetele o le tau ua valoia le afaina ai o atunuu e maualalalo tele faapei o Tuvalu ma Kilipati o loo i le li‘o o atunuu o le Pasefika.