Ua manino le musu o Anthony Joshua e talia le fusuaga ma Dillian Whyte, Tyson Fury poo Deontay Wilder. Ua lau ai e Dillian Whyte le palaai o Joshua ia te ia. O le mea moni, e ao ona feiloai Joshua ma se tasi o le toatolu lea e faaauau ai le tulaga lelei o loo iai le Paga Mamafa. Peitai, e na’o upu ma tala mai le vaega a Joshua i fusuaga e fia, ae e lē o iai ma se ioega ua mautu mo se fusuaga o loo fuafuaina mo Joshua i le masina o Aperila. E lē o toe mamao, na’o le tolu masina o totoe ae e lē o iai ma se fusuaga ua talia e Matchroom Boxing ma Eddie Hearn mo Anthony Joshua.
Ua manino foi le mananao o le toatolu lea, Whyte, Fury ma Wilder e fia tulioso i totonu o le maea ma le siamupini. Peitai e iai lava ni tulaga feeseeseai ai Hearn ma lana vaega i tuutuuga ma pulega a alii fusu e pei ona ta’ua.
E lua mafuaaga o le faaletonu, muamua, e lē o talia e Eddie Hearn ma Anthony Joshua le mananao o le toatolu lea i vaega tupe tetele e fusu ai ma Joshua. O le manao o Wilder e vaelua lelei lava tupe maua ma Joshua – 50/50. E talafeagai foi lea pe a faitauina le taui, o le fusi lea o le WBC oloo ia Deontay Wilder. E faapea foi le manao o Tyson Fury, e manao e fusu pe a oo i le 50/50 foi lana tupe e maua. E sa’o le manao o Fury pe a faitau i le tulaga o ia i le taaloga. E fesiligia foi le manumalo o Joshua i le fusuaga ma Fury pe a taunuu. E maualalo laititi le manao o Whyte, e lē o manao Whyte e vaelua tutusa le tupe.
Peitai, e ese le talitonuga o le toatolu lea ma Hearn, le pule o le Matchroom Boxing. O le faitau a Hearn e na’o le 30% e ofa mo Fury ma Wilder, a’o Whyte e na’o le 20%.
O le ofa a Herne ua ta’ua e Whyte, o se ofa e peiseai, e ta’u mai ai e vaai maulalo Joshua ia te ia.
Fai mai Whyte e “matagā” le tupe ua ofa atu ia te ia, e sili ai lana tupe na maua i le fusuaga ma Derek Chisora i le tupe na ofa atu e Hearn e fusu ai ma Joshua i Wembley. E lē talia e ia lea ofa maulalo faapea.
E ui i faitioga e lē o minoi Hearn i tupe maua mo Whyte, ma ua lau ai e Whyte le palaai o Joshua la te toe fusu. Fai mai Whyte ua faaaogā e Joshua le tulaga o le tupe e ‘alo’alo ai ma ia.
O le manatu foi lea o Fury ma Wilder, o fusuaga ua tatau ona faataunuu ua taofia ona o le faumalo o Anthony Joshua ma Eddie Hearn i tulaga o tupe maua i le fusuaga, a’o le isi faitau a le toatolu lea e lē o manao Joshua e oso i totonu o le maea e feiloai ma latou.
O tagata maualuluga ia o le taaloga o le taimi nei. E maoa’e le tulaga o Dillian Whyte talu le 2015, lea na faia’ina ai ia Joshua, ae na pa’ū foi Joshua i le fusuaga lea ma Whyte. Fai mai Whyte ua faaaogā e Joshua le tulaga o le seleni e ‘alo ese ai mai ia te ia. Na iloa lelei e Joshua o le a ia teena lana ofa ona o le maualalo ae ua fai pea le ofa o se mea faafoliga ina ia faapea ai le lalolagi o loo manao Joshua e fusu ma Whyte.
Ae e pepelo ia tulaga, o le mea moni lava i le talitonuga a Dillian Whyte e musu Joshua la te fusu. Talu mai le la fusuaga mulimuli talu ai nei, e valu malo sosoo o Whyte e aofia ai lona malo ia Lupesoliai Joseph Parker, Derek Chisora ma Lucas Browne. A’o Tyson Fury, na toe tu mai i le fusuaga ma Deontay Wilder, sa tatau lava ona oti i le agavale malosi o Wilder, peitai na toe tulai mai Fury ma faaauau le fusuaga seia mae’a.
Na tutusa le fusuaga i le faaiuga. Ae o le faitau a Tyson Fury, na manumalo ia Wilder i le fusuaga lea ma na’o Joshua o loo totoe. E agavaa foi se fusuaga a Wilder ma Joshua, ona o loo umia pea e Wilder le isi fusi o le lalolagi, peitai, e foliga mai o loo maumauai lava Hearne i ana ofa nei ua tuuina atu mo i latou nei e toatolu, o le teena foi o ofa e le toatolu lenei, ua faailoga fesili ai foi ma se fusuaga mautu a Joshua ia Aperila.
