Ua faasala tupe e le faamasinoga le faipule o Aana Alofi numera 3 le afioga Toesulusulu Cedric Schuster ma nisi o matai ma se taulealea o le afioaga o Satapuala ina ua lauina le faaiuga o lenei faamsinoga i le aso ananafi (Aso Gafua, 5 Aukuso 2013), ina ua mae‘a ona suesueina moliaga ma faamaonia.
O le aiā tatau o le atunuu e feoai saoloto ai ma faimalaga i luga o le alatele, o le itu tāua lea na silasila i ai le faamasinoga i le faia o lana faaiuga.
Saunoa le alii faamasino, le afioga Vaepule Vaemoa Vaai, o le aafia tele o lea tulaga i le pamaa na poloka ai le alatele na iloa i molimau a nisi sa lē mafai ona sopoia lea vaega o le atunuu i le po na amata ai le gaioiga seia oo i le aoauli o le aso na sosoo ai. Sa latou faamatala i le faamasinoga o latou lagona lē fiafia i le pamaa na taofia ai a latou feoaiga, aemaise o amioga a nisi o taulelea o le nuu sa iai i le nofoaga tonu na ati ai le pamaa.
O se itu lelei i le silasila a le faamasinoga, o le faato‘ā molia lea o i latou e toavalu na faamaonia moliaga i ni solitulafono, aemaise o molimau tusitusia sa faaoo atu i le faamasinoga sa faaalia ai le tautua lelei o i latou e lē gata i le nuu, ae o le lotu ma totonu o o latou aiga.
O le moliaga o le faapotopoto i se tulaga solitulafono (unlawful assembly) o le moliga autū lea faasaga ia i latou e toavalu na faamaonia e le faamasinoga. O i latou uma ua faasalaina ai i le totogi o le $1,500 tala ma ia totogi atu i le faamasinoga a o lei taina le 5 i le afiafi o le Aso Lulu o le vaiaso nei. A lē ausia lea taimi faatulagaina, o le a tuuina atu loa i latou i le falepuipui mo le 6 vaiaso.
O moliaga o le faalavelave i le galuega a leoleo, le faia o upu tau faamata‘u ma le lafo o upu taufaifai i leoleo ua faamaonia ae nofo vaavaaia i latou i le 12 masina. O le faatonuga a le faamasinoga ia aua ne‘i toe tulai se isi o i latou i se solitulafono.
Na faatumulia le potu faamasino numera 4 o le Faamasinoga Faaitumalo i le tapuaiga a le afioaga i aiga ma le nuu. Sa auai foi nisi o faipule o le Vaega Faaupufai o le Tautua Samoa, e pei o le sui taitai le afioga Aeau Peniamina ma nisi o faipule e aofia ai Lealailepule Rimoni Aiafi, ma Aveau Niko Palamo ona o le alii faipule le afioga Toesulusulu Cedric Schuster, o se tasi o le latou Vaega Faaupufai.
I le feiloaiga ma tusitala i fafo o le potu faamasino, na faaalia ai le agaga faafetai o le alii faipule i le faaiuga ua aumai ma ua faatoese ai i le atunuu atoa, ona o le tulga na aliali mai i le tausaga ua mavae. Ua faatoese ai foi i lona itumalo o Aana Alofi numera 3 ona o le aafia o le igoa o le itumalo i le mataupu.