Aiga Samoa i Logan City
Na mae‘a ua tasi finagalo ma lagolagoina le mataupu a le laulau sa folasia i lumamea, ma e ui ina foliga e toaitiiti ma toagaogao le Aiga Samoa i Logan City peitai na mafuli ma tuufaatasi loto ma agaga i le faamoemoe o le Posiva na faataunuuina i le afiafi o le Aso Toonai, 23 o Fepuari.
Se mea lava ina a matagofie o uso e nonofo faatasi ma lotogatasi. Ua atoa tupe i le fafao e pei ona faatagisia ai e Laulu se vaa ia goto i se fesoasoani auā se sailiga seleni mo fuafuaga fai a le faalapotopotoga.
E lei atoa se 4 itula ae faamaopoopoina e le Aiga Samoa i Logan City se seleni e tusa ma le $10,000. Sa lagona le agaga faafetai o le Peresetene, le tofa ia Mataafā Hakulā ma le faletua ia Anne Siakisini e lē gata o le Aiga Samoa ae faapea nisi o malo faaaloalogia.
Na auai le Taitai o le faalapotopotoga na Saili Malo i Ipswich, le susuga ia Auvaa Neemia ma le faletua. O le Fesoasoani muamua ole Aiga Samoa i Logan o le susuga ia Tavai Savelio Leota, ma le fesoasoani lua, o le susuga ia Popole Leo ma e ova atu ma le 20 matafale o iai i le taimi nei.
