“E lē ni lafoga ia a se taitai o se atunuu”
O foliga e iloa ai le lē fiafia na faali ane e le taitai ma le sui taitai o le Itu agai, i tusitala i se feiloaiga na valaau e tali mai ai le Itu agai i se finagalo o le Palemia susuga Tuilaepa Lupesoliai Sailele Malielegaoi, na faamatalaina ai e valea se finagalo o le Itu agai i le faapea mai o le latou taitai ua tatau ona fai se palota faanatinati a le atunuu ona ua lē maua se maopoopoga o le vaega faaupufai a le HRPP ma ua tele ina alu ai le taimi o le alii Palemia e tau faamaopoopo ae lē faia ai ona tiute faataitai o le atunuu.
“E lē ni lafoga ia a se taitai o se atunuu ma e faanoanoa tele i nei ituaiga o saunoaga”. O le finagalo puupuu lea o le sui taitai o le Itu agai le afioga A‘eau Peniamina. “E lē tuua ai ma le latou pitolaau o le fesiligia o le Malo auā o le galuega lea a le Itu agai”.
O le finagalo lea o le taitai le afioga Palusalue Faapo II. Faaalia e le sui taitai ma le taitai e lē fia tali i le Palemia i le ituaiga o gagana o loo ia faaaogā, ae o le naunautaiga o se latou tuualalo ia galulue faatasi ma le Malo.
O le finagalo o le Palemia, e lē se mea faigata le faatino o le palota, ae o lana faamatalaga i tusitala, o se Malo valea e agai e faia se palota ae lē iloa pe mafua i se a. Saunoa le alii Palemia o se palota e faia e aliali ai se tulaga lē lelei e oo iai le Itu agai, i le lē toe foi mai o faipule ae na o le taitai o le Itu agai.
Peitai na faaalia e Palusalue ua na o ni lafoga a le alii Palemia e faafilemu ai lagona o le atunuu ae ua na silafia lelei le mea e oo i ai se palota faanatinati e faia, auā e lē o toe maopoopo lana itu faaupufai.
O le feiloiga a tusitala ma le Itu agai na tuusa‘o ai se finagalo o le taitai o le Itu agai i le Palemia ma fesili poo fea ua agai i ai moliaga o le Sui palemia ma se tasi o ana minisita lagolago. “Lea ua taatia ai lava lenei mataupu ae lē se‘i saunoa mai le alii Palemia poo fea ua fai i ai”.
Ua fesiligia foi e le Itu agai le Malo poo fea le sainiga o le maliega ma le kamupani o le Neptune lea o le a umia le isi limasefulu pasene o sea o le kamupani vaa o le Pacific Forum Line. Ua savali i le lua masina e lei toe faailoaina mai e le Malo poo fea ua faatutu i ai le maliega na folafola mai o le a faatino i se sainigalima.
O le mataupu i le lipoti a le suetusi sili na faaalia e le Itu agai, o le latou talitonuga o le taimi lava e faataatia ai se lipoti a se matagaluega a le Malo i le Palemene, e tolu lava masina e ave ai i tulaga faakomiti ona talanoaina lea. Peitai mo le lipoti a le suetusi sili ua 18 masina ae o le masina fou e faatoa talanoaina ai.
