O le faaauauina pea ma le faatupeina o a latou sikolasipi e toafā lea o loo totogiina i tausaga uma, o se tasi o auga autū o le faamoemoe o tamaitai tuai o le kolisi a Sagata Maria, e pei ona faatulaga i le Aso Toonai muamua o Iuni i tausaga uma, e faia ai le Ball a lenei asosi i Kuiniselani, ona o le faanaunauga ma le faamoemoe o se po fiafia e fesuiai ai ni teuga poo ni laei e faatasia ai ma nisi e valaaulia faapitoa i lea aso taupoina.
Ua lē gata ai iina le tele o galuega fesoasoani a tamaitai o St Mary’s, ae o loo latou fesoasoani foi i nisi faalapotopotoga i Brisbane e pei o le falemai o tamaiti i Mater faapea Sisters of Nazareth.
Na taitaia le sauniga amata e le afioga ia Patele Epati Tamati o le taitai o le Puleaga Katoliko ona alo foi lea e faagasolo fuafuaga o le po fiafia aemaise le logomalie o ripoti o galuega faatino a le Asosi.
E lē mafai ona tali tualimaina e le atunuu le faatalauula mai, e pei ona molimauina lava le faatumulia o lea afiafi. Sa auai foi le Peresetene a le Mafutaga a le Voice of Samoan People Incorporated, Tofa Faimalotoa Ioane Pale & faletua ia Pauli Zelly ma nisi o le laulauafono.
Sa auai foi le failautusi o le Victim Support i Kuiniselani, le faletua ia Eseta Frost faapea le tele o malo faaaloalogia. Sa faafiafiaina le po e le faaili mālie a le One Sound, Susuga ia Eric Pepe ma le vaega.
O le Komiti a Tamaitai Tuai a St Mary’s i Kuiniselani. Peresetene: Agnes Felix; Vice President: Foloi Fonoti Wall; Failautusi: Joyita Toalepaialii; Teutupe: Letiaa Lam.
O nisi o tamaitai o le asosi o Moana Nimo, Pearl Tupua ma Teresa Washburn.
