Ua matuā ioe ma faamo‘i le Tautua Samoa i le lipoti a le alii tusitala o John Campbell o le TV3 a Niu Sila, i le fesiligia o le Malo Samoa i ona taitai, poo fea o iai le selau miliona o tupe o fesoasoani o le sunami.
“O le mea lea na matou fesiligia foi i le Palemene ma taumafai atu i le Malo e aumai se faamalamalamaga, ae faasenunui lava ma foliga e lē ano mai, ae ua ā nei la ?” O le finagalo lea o le sui faipule o le vaega faaupufai o le Tautua Samoa, afioga Palusalue Faapo II, i se feiloaiga i le Aso Tofi, 7 o Oketopa 2010.
“O le ā le mea ua lē mafai ai ona tali le fesili faigofie, poo fea o iai le isi selau miliona. Tatau ona faamatalatala ma faailoa poo ā mafuaaga ua lē alu uma ai seleni o fesoasoani i tagata tonu na aafia? O le isi lea finagalo faaopoopo o le sui faipule o Safata.
O le tofa Lealailepule Rimoni Aiafi o se tasi o sui faaolioli mo le palota o le tausaga fou ae o ia foi o le sui sooupu mo le Tautua Samoa.
Na ia faaalia e iai aiga i nuu na aafia e oo mai i le taimi nei, e lē o maua se suavai, lē maua se fale fou e nofo ai, ma lē maua se eletise.
Saunoa Lealailepule o lana suesuega na faia na ia iloa ai, o nisi o aiga sa faaleagaina fale sa nonofo ai ulugalii ma a latou fanau, faapea le fale autū sa iai mātua poo le matai, o loo nonofo pea i nai fale e faufau i fasi apa ma pou oganiu, ae o le fesoasoani a le Malo sa na o le fale autū ua fausia ai.
“Sa tatau i le Malo ona fau uma fale o aiga ae lē o le fale e tasi, auā ana ave uma tupe na aumai mo i latou na mafatia semanu e toe maua uma lava fale o nai aiga na aafia i le galulolo”.
O le isi itu na faaalia e Lealailepule o le eletise, ua na o le tatoso o laina agai i nofoaga ua faasee i ai aiga i uta, ae e lei uaeaina fale.
O le finagalo o lea sui faaolioli o le Tautua Samoa e faapea, e lē o faatupeina i fesoasoani na aumai le uaeaina ma le faaolaina o moli o aiga ae o vaega uma ia na ia ta‘ua sa tatau ona aofia i le polokalame a le Malo.
“Manatua foi a o lei tupu le mafuie ma le sunami, sa lelei uma lava fale o aiga, lelei le suavai ma le eletise, ae na tupu loa le faalavelave faaleagaina uma loa vaega ia.
O lo‘u la manatu e lē tatau i le Malo ona ave na o se vaega ae faaleleia uma vaega o meatotino a tagata na afaina”. O le isi lea toe faaopoopo mai o le finagalo o Lealailepule Rimoni.
O loo tūtūaai pea le Malo i le latou mau e lei faaaluvaleina seleni o meaalofa, ae na alu sa‘o uma lava i galuega, e pei o alatetele, suavai ma le eletise faapea le fausia o fale.
Peitai o le lipoti o le faaaogāina o fesoasoani ua mae‘a ona faalauaitele mai e le Malo ona o le lipoti a le TV3 a Niu Sila, o loo toe fautuaina ai e le Palemia le Matagaluega o Tupe a le Malo, ina ia tuuina atu nisi faamatalaga auiliili e saga faamalamalama ai le faaaogāina o seleni ina ia saga manino atili ai le mau a le Malo.
O le afioga Palusalue Faapo na ia faaalia, sa faaaogā uma e le Malo seleni i galuega o le sunami, peitai o lona finagalo ana ave sa‘o tupe i galuega o le galulolo semanu e leai ni faafitauli e tulai mai i le iai pea o aiga e lei maua se suavai ma ni fale.
Peitai o le mau a Palusalue ua ave seleni o le sunami ua fai ai isi galuega e lē fesootai ma le sunami.
O loo iai masalosaloga o lea sui a faipule, o nisi o tupe na ave e faaleleia ai le uafu ma le vaega toso vaa i Satitoa lea na toe faaleagaina i le galulolo.
