“O se fiafiaga lea i le matou auaunaga e faalauiloa faipelega”..Telei‘ai Puni
O le SamoaTele o le kamupani telefoni ma fesootaiga faaonapo nei a Samoa ua faatau nei e le kamupani o le BlueSky i Amerika Samoa, peitai e ui ina faatino lea fuafuaga e le Malo ae e lē o tuua ai lava le aapa atu o le kamupani e faatupe le atiina‘e o taaloga mo alo ma fanau a le atunuu. O le SamoaTel o loo lagolago autū i le iai i Niu Sila o nisi o alo ma fanau a Samoa i faipelega i le faamoemoe e tausinio ma nisi o tama fusu lelei i Aotearoa i le aso o le faipelega tele a Tooletai David Tua i laufanua o Niu Sila ia Mati aso 19.
“E lagona le fiafia i le aumai o le lagolago a le kamupani ma e lē masalosalo foi o le a taunuu i se tulaga lelei le faamoemoe o alo ma fanau a Samoa”, o le finagalo lea o le tofa Telei‘ai Edwin Puni o le pulega o le EventPolynesia o loo faalauiloaina (promoter) fusuaga a tama fanau a le atunuu.
O i latou ua filifilia mai Samoa o le a faipele i le undercard poo paga e muamua a o lei faia le fusuaga autū a Tooletai David Tua. O i latou ia e aofia ai Leti Leti, Warren Fuiava, Pele Faumui ma Vaitele Soi.
O le feiloaiga a le EventPolynesia ma kalapu fusu i Samoa faapea ma le failautusi aoao o le asosi o fusuaga faapolofesa i lo tatou atunuu, na faalauiloa ai tama fusu lea na tuua Samoa i le Aso Lua na tea nei ma malaga mai i Niu Sila e sauniuni ai ma tapenapena mo a latou fusuaga.
Talu ona tulai mai nisi o tamalii o le atunuu e toe faaolaola lenei faagatama, ua molimauia le toe maualuga o le fiafia o tama talavou o le atunuu i faipelega.
Ua molimauina fou le agai o le Malo e saili avanoa talafeagai uma e siita ai lenei taaloga sa sili ona maualuga ai ‘ai o Samoa i taaloga faavaomalo.
Na faaalia e le failautusi o le asosi faipelega faapolofesa i Samoa le tofa Ale Vena, o loo naunau le latou asosi e saga saili pea nisi avanoa mo fanau a le atunuu e laasia ai le tulaga maualuga i faipelega faapolofesa, e pei ona mau avanoa ai i latou e toafā o le a undercard i le faipelega a le isi alo o Samoa le susuga Tooletai. E utiuti seleni maua mo le atiina a‘e o le taaloga ae na faaalia e Ale e faigofie mea uma pe a lagolago malosi le atunuu ma le Malo i taumafaiga o loo faia e kalapu fusu ma maea fusu eseese i le atunuu.
