E toaiva sui o Malo o le lalolagi o loo tauva i le tofi Faatonu aoao o le Faalapotopotoga o Fefaatauaiga a le Lalolagi le WTO (World Trade Organisation), ma e aofia ai ma le Minisita o Fefaatauaiga a le Malo o Niu Sila o Tim Groser, lea ua ave i ai le lagolago malosi a Samoa.
O le Sui Palemia le tofa Fonotoe Nuafesili Pierre Lauofo, o ia foi o le minisita o fefaatauaiga, pisinisi ma alamanuia, na ia faailoa lea lagolago ina ua faia se feiloaiga ma le minisita o Niu Sila i Apia.
O le finagalo o le Sui Palemia i se feiloaiga ma tusitala na ia faaalia ai le tāua tele o lea tofiga ma e ao ai lava ona toto‘a ma fai se faaiuga a Samoa i se tulaga faaeteete, ma o le mafuaaga foi lea na vailiili ai e Samoa mo le fia iloa agavaa o i latou e toaiva o loo faatutu mai mo le tofiga.
O fefaatauaiga o se itu tāua tele i le tamaoaiga o se atunuu ma o le isi lea mafuaaga na silasila ai Samoa i sana faaiuga fetaui ma talafeagai i se sui e ave i ai lana lagolago, lea na maua ai le finagalo o le Malo e ave le lagolago i le sui faatū mai le Malo o Niu Sila.
O feiloaiga a minisita e toalua sa talanoaina atili ai fefaatauaiga ma auala e mafai ona faaleleia ai aemaise o auala e fesoasoani ai Niu Sila i le faaleleia o fefaatauaiga a Samoa ma isi atunuu o le Pasefika. O le tautinoga foi lea ua folafola e Tim Groser o lona saili o auala uma e talafeagai pe a filifilia e avea ma faatonu e siitia ai fefaatauaiga a atunuu o le Pasefika i le va ma malo malolosi.
O le afea o Samoa, o le atunuu muamua lea o le Pasefika na asia e Tim Groser, ma faasolosolo atu ai i isi malo o le Pasefika. O le talitonuga maumaututu o le isi foi lea mafuaaga o le afea o Malo laiti o le Pasefika o le fia sailia e le Minisita o fefaatauaiga a Niu Sila poo fea o iai le lagolago a isi atunuu.
E lē o iloa poo afea o le a faia ai le faaiuga mulimuli ma faailoa mai ai poo ai le sui faatū o le a tusi aao i ai i latou o le a feagai ma le iloiloina o se faaiuga i se tasi e avea ma Faatonu aoao o le WTO.
O Samoa na avea aloaia ma sui o le faalapotopotoga i le tausaga ua mavae, ma o le faaiuga a Samoa e ofi i le WTO e lei faigofie ona sa tele tausaga sa fefulisai ai faalaau mamafa finagalo o le Malo, aemaise sa faaalia foi i ai lagona o le lautele o tagata aemaise o pisinisi.
