“E lagona le faafetai i le taitaifono i le lagolago malosi i tapenaga a le Malisi i Amerika Samoa”
O le fia faamautu o le lagolagoina o lea faamoemoe sa afea ai Samoa e se savali a le peresitene ma le faatonu o taaloga a le kalapu a le Malisi i Tutuila.
O le afioga Toleafoa Isitolo Wulf, o le peresitene ae o le susuga Tuifaasisina Taule‘ave Toluono o le faatonu o taaloga a le kalapu, sa la afea le ofisa o le Palemia, o le taitaifono foi lea o le Iuni lakapi a Samoa le susuga Tuilaepa L Sailele Malielegaoi.
“E lagona le faafetai ma le fiafia i le tali mai a le taitaifono e fia lagolago atu i le atina‘e o le lakapi i si o matou motu tuaoi, ma ua ia talia ai le matou valaau faaaloalo e afio atu e maimoaina ma molimauina le faagasologa o le matou taamilosaga taitoafitu”, saunoa ai le peresitene i se faatalanoaga na faia i le faletalimalo o le Eden’s Edge i Togafuafua. “O le naunautaiga o le kalapu ia fesoasoani i le atina‘e o le tupulaga talavou i le itu i taaloga, ma o le naunautaiga foi lena ia te au ina ia maua atu le lagolago a Samoa Tutoatasi e ala i le iuni lakapi aoao a le atunuu”.
O le tofa Tuilagi Saipele Esera ma le susuga Su‘a Faafouina, o loo fesoasoani i tapenaga a le Malisi i Tutuila i fesootaiga ma kalapu i Niu Sila, Tonga ma Fiti mo le auina mai o ni a latou aulakapi taitoafitu.
“O le taimi lenei ua faamaonia le auai mai o se ‘au mai Tokelau ae o loo faatalitali pea i feutanaiga ma isi ‘au mai fafo, na saunoa ai Tuifaasisina Taule‘ave Toluono.
“O le taimi lenei ia matou tapenaga ua tele kamupani ma pisinisi ua lagolago atu, ma o le tupe atoa o loo fuafua e faatupe ai le faamoemoe e selau afe tala Amerika”. E fitu aulakapi taitoafitu mai Samoa ua faamaonia o le a tausinio i lea taamilosaga i le masina fou, e faia i le vaitaimi ua lalata atu i le faamanatuina o le Fu‘a a Amerika Samoa, lea e pa‘ū tonu i le aso 17, ae o le aso 13 ma le 14 e faia ai le taamilosaga fitu faavaomalo a le Malisi. E $10,000 le faailogatupe o le manumalo mo le ‘au o le a siamupini.
“O le talia e le taitaifono o le iuni a Samoa e malaga atu o le a ia maimoaina ai se tausinioga mataina auā e iai lo matou lagona, e au foi ina toe sailia e ‘au masii mai Upolu le siamupini”, na saunoa ai Toleafoa Isitolo.
O le itu i le puipuiga o le saogalemu o tagata taaalo na faaalia e Toleafoa ua mae‘a ona faia ai a latou fesootaiga ma le Komesina o leoleo a le teritori, ma ua faamautu ai le malu o le puipuiga.
O laufali foi mai Samoa ma Niu Sila o le a faatautaia taaloga uma, ma o le tasi lea tulaga ua ave foi i ai le faamuamua i le itu i le puipuia malu o le saogalemu o alii laufali.
