Ua amata e le Faalapotopotoga o le Soifua Maloloina a le Lalolagi, le WHO, se polokalame e ta‘ua o le Healthy Islands Recognition, ma o lenei polokalame o loo avanoa mo soo se faalapotopotoga i le Pasefika o loo naunau i tulaga tau soifua maloloina i totonu o atumotu uma o le Pasefika ina ia talosaga atu i ai mo ni fesoasoani.
Saunoa Dr Chen Ken, o loo galue e fai ma sui o le WHO i totonu o le Pasefika ma o ia foi o le Director o le Pacific Technical Support, “O lenei polokalame o le a lagolagosua i le galuega o loo faatino e taitai o faalapotopotoga ma komiuniti a le soifua maloloina, ina ia mautinoa e ausia le moemitiga poo le sini autū ina ia iai ni Atumotu e Maloloina (Healthy Islands), ia avea o ni nofoaga e tutupu a‘e ai ni fanau e ola maloloina i le tino ma le mafaufau; ni siomaga e faigofie i ona tagata ona fiafia e a‘oa‘oina ai ni mea fou ma fiafia e malolo ma tafafao ai; ni nofoaga e mafai e ona tagata ona galulue seia oo lava ina matutua o loo ola fiafia pea; o se nofoaga e avea ma puna o lagona mitamita o ona tagata; aemaise lona suasami o loo siomia ai le vasa loaloa ia mafai ona puipuia mai lamatiaga uma e ono faaleagaina ai.”
I se pepa o faamatalaga o loo faalauiloa ai lenei faamoemoe o le WHO, o loo ta‘ua e lo latou sui i le Pasefika, Dr Chen Ken, o lenei polokalame fou, o le a fai paaga ma lagolago malosi mai i poloklalame a faalapotopotoga uma ma vaega a le soifua maloloina ia o loo faagasolo i le taimi nei, ina ia vave ona iloga mai a latou fuafuaga o loo faataatitia mo se soifua maloloina lelei o o latou nuu ma atunuu.
E lua ni vaega o loo tilotilo i ai le WHO e faaauala atu ai a latou fesoasoani: o le faatinoga o galuega e sili ona lelei (best practice) ma le faatulagaga o galuegafai e sili ona lelei (best proposal).
O le a fono sui o le WHO ma le komiti o le polokalame (Healthy Islands Recognition Committee) e iloilo lelei talosaga uma o le a tuuina atu, i fonotaga taitasi a minisita o le Soifua Maloloina a le Pasefika, e amata faatasi ma le Fono lona lua a le Healthy Islands ia Aperila o le tausaga fou.
O se avanoa lelei lenei mo sosaiete uma ma faalapotopotoga e maua ai lenei fesoasoani mai le WHO mo a latou atinae ma polokalame auā le uunaia o le soifua maloloina i totonu o nuu, itumalo aemaise le atunuu atoa.
O loo fautuaina le lafoina atu o nei talosaga i le computer, pe a download mai pepa e faatumu ai talosaga, mai le website a le WHO SP, i le www.wpro.who.int/southpacific/.
E faagata le tuuina mai o talosaga i le aso 31 o Tesema 2010. O loo maua atili nisi faamatalaga i lenei polokalame fesoasoani a le WHO, mai ia Dr. Temo Waqanivalu, Technical Officer, Nutrition and Physical Activities, WHO South Pacific, i lana telefoni, (679) 3234 147 pe imeli i ai: WaqanivaluT@wpro.who.int
