O le filifilia o le fusuaga a tagata taualoa (celebrity boxing match) e faalauiloa ai faafitauli o loo feagai ma ‘tetea’ (albinos) i Samoa ma saili seleni ai le faalapotopotoga a le Clarence Sebastian Foundation e lei tupu fua.
O le taeao o le Aso Lua talu ai, na faafesagai ai moto a Clarence, le alii tetea laitiiti o loo faaigoa ai le faalapotopotoga, ma Satiamaalii Vaitele Soi o loo siamupini i le aupaga o le cruiserweight a Samoa, i le mae‘a ona tauaaoina atu le fesoasoani tupe e $1,000 mai le kamupani fai fusuaga o le Event Polynesia, o se faaopoopoga i le sailiga seleni na maua i le fusuaga i le Aso Toonai.
Sa faapea foi ona auai i le taeao o le Aso Lua talu ai mātua o Clarence, ia Junior Leota ma Pricilla, o i laua e pulea le faletoleni o le JP Fitness.
I le na o le 3 o ona tausaga, o loo iai faafitauli o loo feagai nei ma Clarence i lona soifua maloloina ma aafiaga i tulaga faailoga tagata e faasaga ia i latou o tetea.
E ui ina mautu le tausiga faamatua ma le vaaiga o ia, o loo iai pea le tele o faafitauli o le a feagai ma Clarence i le lumanai.
Fetalai Pa‘u Fereti Puni o le pulega a le Event Polynesia, “E tele le sao o le JP Fitness i le atinaeina o tama fusu faapolofesa i Samoa e pei o Vaitele aemaise o le tau faaolaolaina o fusuaga faapolofesa i Samoa. O se avanoa lenei matou te faafetaia ai le lagolago a le JP Fitness i le atinaeina o fusuaga.”
I le saunoaga a Le Bernadette Afeata sa fai ma sui o le faalapotopotoga na saunoa ai, “O le tulaga i tagata tetea, o se aafiaga i le pa‘u o le tino ona o le lē lava o ‘colour pigment’ e aafia ai mata, laulu ma le pa‘u.
O le faamoemoe o le faalapotopotoga ia fausia se nofoaga e mafai ona fai ai siaki faalesoifua maloloina ma fesoasoani i aafiaga o le faailogatagata i tetea i totonu o Samoa. Matou te talia ma le faafetai le foai a le Event Polynesia.”
I le taimi nei, e tusa ma le 300 tetea o loo soifua i Samoa o loo aafia i aafiaga tau le soifua maloloina e iai le mafoegofie o le pa‘u, tiga o mata i le malamalama, telē le ono aafia i le kanesa o le pa‘u ae sili ona faigata o le tulaga faailogatagata ma le ulagia.
I le faatū ai o lenei faalapotopotoga, o le autu ma le faamoemoe ia faailoa mo le aoaoina o aiga ma tagata lautele, aemaise o le lagolago i tulaga tau fesoasoani tau tupe ma sailiiliga.
O le Aso Lua foi na faalauiloa ai e le Event Polynesia le filifilia o le Clarence Sebastian Foundation mo tetea ma o latou aiga i Samoa, e avea ma faalapotopotoga e latou te lagolagoina malosi.
