Ua ave le lagolago a le Malo i se taumafaiga e a‘oa‘oina lelei i latou o faafoeina pisinisi o faletalimalo tu matafaga i tomai e faia ai galuega laveai e faasaoina ai soifua o tulisi e taeele i gataifale o le atunuu.
O le alii Palemia o ia foi o le Minisita o le pulega o tagata tafafao na ia tatalaina lea a‘oa‘oga i le amataga o le vaiaso, ma ia faaalia ai le tāua tele o le ofoina atu o le fesoasoani muamua i turisi, e aafia soifua i taelega i matafaga o loo fiafia e taeele ai.
O lana saunoaga lea i le tatalaina o lenei plokalame sa ia faatāua ai le lalelei poo le matagofie o Samoa, faapea ma lona tulaga saogalemu, o ni upu e tatau ona mataulia ai Samoa e tagata asiasi mai poo turisi.
O le faletalimalo tumatafaga i Lalomanu Aleipata na amata ai e nisi o alii mai Ausetalia ua iai lea tomai ni a‘oa‘oga faapea i le tausaga ua mavae, ae o le taimi muamua lenei ua aloaia ai se polokalame ua lagolagoina e le pulega o tagata tafafao ma le Malo.
O le polokalame fou la lenei, le Surf Life Saving mo le a‘oa‘oina o galuega laveai mo e taeele i le sami, o se polokalame ua soosoo tau‘au ai le Pulega o Tagata Tafafao Maimoa mai Fafo Samoa Tourism Authority ma le malo Ausetalia, e tauala mai le latou polokalame e ta‘ua o le Youth Ambassadors, lea e ofofua ai taimi o nisi o alii ma tamaitai talavou o lea atunuu, latou te faia lenei galuega fesoasoani ma laveai ai ola o tagata e aafia i taelega i vai ma le sami.
E ono masina o le a faagasolo ai lenei polokalame, ae iai le faamoemoe, e toe maua foi se isi ono masina e toe faaauau atili ai lenei lava nei a‘oa‘oga ina ia toatele nisi o le atunuu e maua mai ai ni tomai.
O nei a‘oa‘oga o le a faagasolo i Upolu ma faasolo atu i Savaii, ma e iai le faamoemoe o le a toetele sui mai nofoaga uma o loo faia auaunaga tau turisi, o le a auai i lenei polokalame tāua tele i isi masina o lumanai ai.
E oo foi ia i latou o loo iai o latou vaa fagota, ma nisi o mai nuu ma afioaga, o le a mafai lava ona maua avanoa e auai ane ai i nei a‘oa‘oga, ina ia matuā maua le tomai lelei mo le faatinoina o nei galuega laveai.
