I afioaga uma ua oo i ai le Toomaga mo Ē Puapuagatia, ua faamautu ai sui o ia afioaga o le a fai ma fesootaiga o nuu faapea ai lea faalapotopotoga.
O le talafatai o Apia o loo faagasolo ai a‘oa‘oga ma feiloaiga a le Toomaga mo Ē Puapuagatia, ua faalauiloa atili le latou auaunaga ma ua talosagaina ai le sao o faalapotopotoga e pei o autalavou, komiti a tina ma tamaitai faapea ai ma pulega a alii ma faipule o nuu taitasi.
O lea sao ua faaauala mai i ni sui e tofia e afioaga taitasi mai i ia faalapotopotoga auā le logo atu i le Toomaga mo Ē Puapuagatia o ni mataupu o loo afaina ai fanau ma tamaitai aemaise isi foi sui o aiga taitasi.
O ni faiga solitulafono i totonu o aiga, nuu ma ekalesia e tatau ona tāpā ai se fesoasoani a le faalapotopotoga aemaise o mataupu maaleale e lē o mafai ona faatautaia ni faaiuga i totonu o aiga pe ua lē mafai foi ona fai sa‘o i ai ni faaiuga a nuu ma faalapotopotoga eseese i totonu o afioaga.
O nei la feiloaiga ua faatautaia i totonu o afioaga, ua tofia ai nei sui taitoalua pe taitoatolu foi mai afioaga taitasi, ma o masina uma o le a fesootai ai ma le faalapotopotoga o le Toomaga ma vaavaai poo ā ni mataupu e ono lāgā i lea masina ma lea masina, ae o ai foi o loo moomia pea le fesoasoani mo aiga aemaise o nuu taitasi ina ia taofia ai sauāga o loo tulai mai pea.
Ua mae‘a foi ona faamautu fesootaiga a le Matagaluega o Tina ma Tamaitai, Atina‘e o Nuu ma Aga Fesootai ma le Toomaga e ala lea i le galuega faagasolo a tamā ua tetee atu i sauāga faasaga i tina ma fanau. O lea vaega o galuega a le Matagaluega ua unaia ai le fai e tamā o faaiuga sa‘o i totonu o nuu pe a tulai mai sauāga ma sauāga matagā faasaga i fanau aemaise foi tina o aiga.
O le faalapotopotoga lenei ua faagaioia lenei faalauiloa o loo taitai ai le afioga Afamasaga Toleafoa o lē sa avea ma Konesula o Samoa i Niu Sila i tausaga ua mavae.
O ia atoa ai isi taitai o ekalesia lotu ma taitai faalemalo ma pisinisi, o loo agai i afioaga taitasi ina ia saga unaia le feau tāua e taofi le sauāina o fanau ma tamaitai i totonu o aiga, ekalesia ma nuu.
Ua tele fonotaga ua faia i afioaga eseese ma le faalapotopotoga lenei o tamā ua galulue faatasi e tetee atu i nei sauāga, ma o se tasi o mataupu ua unaia ai ina ia tausolomua i pulega a alii ma faipule o afioaga taitasi, le ave i luma o le nuu o soo se alii lava e faia soligatulafono faasaga i tamaitai ma fanau. Faaalia e Afamasaga, o loo tele le lagolago ae faato‘ā iloa le moni o lea lagolago pe a amata ona vaaia le faatino o faasalaga e le nuu e faatatau i matai seia oo i taulelea talavou e maua o fai nei sauāga i fanau.
O le sao la o sui fou nei ua tofia o sui o le Toomaga mo Ē Puapuagatia i totonu o nuu taitasi, o le fesootai lea ma le faalapotopotoga i ona ofisa i Apia pe a tulai mai ni faafitauli faapenei ua aafia ai tamaitai ma fanau o nuu.
