O se finagalo o le Afioga Tuia Paepae Letoa o le tasi o sui o le Itumalo Safata i le Palemene, na ia tāpā ai le afioga i le Sui Palemia, o le Minisita foi lea o le Pulega o Tagata Tafafao Mai Fafo, ina ia faamalosia le faapaiaina o le Aso Sa mo tapuaiga lotu a tagata Samoa.
Ua auala mai lea talosaga i lana folasaga i luma o le Palemene e faatatau lea i le talanoaina o le Tala Faatatau Faaopoopo o le Tupe.
I le saunoaga a Tuiā na ia lāgā ai le atina‘e o tagata tafafao mai ma le tāua i le tamaoaiga o le atunuu ae o lona manatu, e ui i lea itu, e tāua atu le faamamalu ua ave e Samoa i ana tapuaiga lotu.
Ta‘ua e Tuiā, o le Faavae lava o Samoa ua manino ai o le atunuu Kerisiano ma o lana faamuamua ua ave i le Atua ma le tapuaiga faa-Kerisiano.
Na ia faaalia e tatau lava ona faamanino i tagata mai isi atunuu o loo agai mai mo tafaoga i Samoa, o le Aso Sa e lē tatau ona faatino ai ni tafaoga poo ni fiafia foi ona o le aso lea ua faamamalu lava e Samoa auā a latou tapuaiga.
O le aso lea na ta‘ua e le alii faipule tutoatasi, ua ave ai e Samoa le faatāua i le Atua ma e tapunia ai lava soo se nofoaga tele o fefaatauaiga ma taofia ai ma ni faiga ua ese mai i tapuaiga lotu masani.
O matafaga o le atunuu ua ta‘ua e le alii Faipule ua avea ma nofoaga tutotonu o fiafiaga ma tafaoga i Aso Sa, ma o le popolega o le sui a faipule ne‘i avea le naunau i le seleni maua a le tagata tafao mai, ma auala o le a faatuatuanai ai le faatāua ua mautu i le Faavae o le atunuu.
O le Alii Palemia, le Susuga Tuilaepa Lupesoliai Sailele Malielegaoi na tulai ina ua faatū le finagalo lea o le alii Faipule ma ia ta‘ua ai, o totonu foi o le Faavae o Samoa o loo faamautu ai le aiā tatau a tagata ia latou tapuaiga.
O le saolotoga lea na ta‘ua e le Ta‘ita‘i o le Malo ua ave i soo se tagata soifua i Samoa ma ē asiasi mai e faamamalu ai a latou lava tapuaiga lotu, pe faa-Kerisiano pe ese foi.
O lea saolotoga e pei ona i totonu o le Faavae, ua ta‘ua e le Alii Palemia e lē mafai ona ave ai le faamuamua i isi tagata soifua ae faatuatuanai isi.
Ta‘ua foi e le Alii Palemia e mafai ona faatonu e le tamā le atalii i ana amioga fai ae e lē mafai e le Malo ona aapa atu ma faatonu i latou e lē o agai i le lotu i le Aso Sa ona o le latou lava lea filifiliga.
O le tele o apitaga tumatafaga e pei ona māua e a tatou lipoti, ua ave lava le fautuaga i tagata tafafao mai fafo ina ia o latou amanaia ai le Aso Sa ma o le faamoemoe lea o le Pulega o i latou o loo umia ia nofoaga ua faamautu ai le tele o tagata asiasi mai ma o nisi nofoaga ua fautuaina le agai o tagata tafafao mai i le lotu ae o isi ua logo i ai e taofia fiafia ma soo se faiga e ono lepeti ai le filemu ma le faamamaluina o le Aso Sa e nuu taitasi.
O se tasi o vaaiga ua tulai mai e pei foi ona laga muamua e nisi o sui o le Palemene, ua lē o tagata tafafao mai i fafo i le matafaga i Aso Sa ona ua avea ma Sapati a le atunuu, ae ua solomua lava i o tatou tagata le faia o lea tulaga ma ua faaaogā ai le Aso Sa e agai ai i afioaga e iai matafaga auā malologa ma toonai o le Aso Sa.
O le tele lava o apitaga tumatafaga i Samoa o loo malu puipuia a latou tapu ma sā i ia aso e pulega a alii ma faipule o ia nuu.
