Ua amata ona masua mai i fafo faamatalaga e iloa ai le tina tonu mai Samoa na sau ai lipoti mai le atunuu o Meleisia e faapea na fanau i se faleui i lea atunuu, ae na uma lafoai lana pepe i se lapisi.
Na pau le tulaga e mafai ona faailoa atu o le tina e fai le toalua ma le fanau. Sa alu i Meleisia mo se a’oa’oga i mataupu tau soifua maloloina.
O le vaiaso o lumanai nei na faaalia e se molimau faatuatuaina o le a tulai ai i le faamasinoga maualuga i Mulinuu e tali i moliaga o le lē faia o lona tiute faasino i le puipuiga o le saogalemu o se pepe na ia fanauina, ma le moliaga o le lafoai o le pepe ua uma le ola, ma ua lagomau i Melesia lana pepe.
O le a lē faailoaina le suafa o le tina ae o le a faatali se’i tulai i le faamasinoga.
O le tamaitai Haikomesina o Samoa i Ausetalia o Hinauri Petana na malaga i Meleisia o se sui o le Malo e faia feutanaiga mo le aumaia i Samoa o le tina e tali ai i moliaga, ma sa la malaga mai foi i Samoa ona toe taliu ai lea o le Haikomesina i lona ofisa i Canberra i Ausetalia. O se tasi lea o solitulafono ua aliali mai i totonu o se masina ae tolu pepe ua lafoai ai ma ua uma foi ola.
O le pepe muamua na maua i gataifale o Laulii, sosoo ai le pepe a le tina Samoa na fanau tiai ao iai i le atunuu o Meleisia, ma le pepe na maua i le lapisi o le uafu i Mulifanua.
O se solitulafono e ogaoga tele ma o le falepuipui lona faasalaga.
O se solitulafono foi o loo tuu fesilisili ai lagona o le toatele pe aisea ua aliali mai ai pea ae pe o le ā foi le mafuaaga. O le Toomaga mo ē Puapuagatia o se tasi lea o faalapotopotoga tuma’oti o loo mafai ona ave i ai e se tina se pepe na te fanauina pe afai ua lē manao i ai, ma o le Toomaga ua latou ofoina ai le tautua o le tausia o ni pepe faapea.
O lea foi ua iai se finagalo o le sui taitaifono o le Fono a Ekalesia Soofaatasi i Samoa, ua ia manatu ai o se fofo e faasaoina ai ola o ni pepe e lafoai, o le saunia o se nofoaga e mafai ona agai iai ni fanau teine ua ma’itaga poo ni tina foi e ave i ai a latou pepe, ona avanoa lea o nisi o loo fia maua ni fanau ona latou ave e tausi.
O loo manino i le silafia o le toatele mafuaaga e mafua ai ona tutupu ni tulaga faapea auā o mea o loo tutupu pea i le olaga o loo tatou ola ma soifua ai. Muamua e mafua ona fanau tia’i le pepe ona o se ma’itaga lē manaomia. Na faaalia e se tasi o leoleo sinia o ma’itaga lē manaomia e mafua mai i se faigauo a se alii ma se tamaitai ua taunuu ina ma’ito ae e lei faapaiaina i le faaipoipoga.
O se ma’itaga na mafua i se faigaaiga fai faamalosi, poo se ma’itaga e mafua mai ona o se faiga faapouliuli i le va o se tamaloa ma sona afafine poo se tasi o tamaitai e iai o la sootaga vava lalata tau toto ivi ma aano.
Ua maua e leoleo faamatalaga ua iloa ai le tina e ana le pepe na maua i le lapisi a le uafu i Mulifanua, ae o loo sailia pea le tina e ana le pepe na maua i le sami i gataifale o Laulii. Ua faaalia ese matai o le nuu ua oo atu ia te ia faamatalaga ua tau vavala atu ai faamatalaga o le tina e ana le pepe, ae o loo faatali sei mautinoa ona logo lea o leoleo.
