E faataamilo lava le sulu o le filemu e faalauiloa ai le tetee atu i le sauaina o tina ma tamaitai ma fanau i Samoa, ae gasolosolo atu lava nisi o le atunuu i afioaga ma nuu na oo i ai le sulu a le Toomaga mo e Puapuagatia, e faailoa sauaga o loo aafia ai.
O le tele lava o i latou o tina ua latou faailoa i le Toomaga le sauaina o i latou e o latou taitoalua.
O le molimau mai lea a le pelesetene o le faalapotopotoga o le Toomaga, le faletua o Lina Chang, ina ua foi i Apia le faataamiloina o le sulu o le filemu i Salafai.
“Lagona lava le fiafia ona ua avea tala‘iga o loo faia e le Toomaga ua tia‘i ai le fefe ma le matamuli o nisi o tina ma fanau ae ua omai lava ma ta‘u mai le fia maua o se fesoasoani i sauaga o loo faia ia i latou”.
E lei faailoaina e le pelesetene pe toafia ni tina ma ni fanau na agai atu ma o latou faafitauli tau sauaga a o faasavali le sulu, ae o le isi ana faamatalaga e iai ma se tasi o mataupu sa sauaina ai se tamaitai talavou i se tasi o nuu i Savaii, ae na fono alii ma faipule ma faia le faaiuga e faasala le teineitiiti ae lē faasalaina le tamaloa o loo tuua‘ia e le teineitiiti na taumafai e faamalosi o ia.
“O le isi lena mataupu na matou maua i le faasavaliina o le sulu, ma o lea e tuu se‘i oo atu i Apia pe a mae‘a le faalauiloa o le matou mataupu ona suesue atili lea; sole o fea ni mea ua faasala le teineitiiti ae lē faia se faasalaga o le tamaloa”.
E iai afioaga ma nuu e lē gata ina lagolago i le tala‘iga a le Toomaga ae na lafo a latou seleni e fai meaalofa ai i galuega a le faalapotopotoga, peitai e lei faailoaina mai e le Toomaga pe fia se seleni na latou maua i le aao mafola o nisi o le atunuu ina ua amata faasavali le latou sulu i se vaega o Upolu ma agai atu ai i Savaii.
O le vaiaso nei o loo toe faaauau ai lea faamoemoe seia oo ina mae‘a ma tini atu i luma maota o le Malo ile eleele fou.
O le afioaga o Toamua na malolo ai le sulu i le Aso Faraile ua mavae ma moe ai mo le faaiuga o le vaiaso. O le autū o lenei tala‘iga ia oo i lagona o tagata uma le tāua o le feau ia tafiesea sauaga faasaga i fanau o tina ma tamaitai o le atunuu.
O le faamoemoe lenei o loo galulue ai foi nisi o faalapotopotoga tuma‘oti i Samoa ona o se feau o loo faamanatu pea i tausaga uma e pei ona iai se faaiuga a Malo Aufaatasi.
