Lafoai galuega taulasea, alu i le faaolataga

Ua lagona e le ulugalii taulasea o Felavasa‘i ma Sela Lavasii, le loto faafetai i le Atua ua maea suesuega a le faamasinoga i o la moliaga ma ua faaleaogaina le fasioti tagata paivalea, ae faamaonia le moliaga o le faia o ni faaooga-manua lea o le a faia i ai se faaiuga i le aso 18 o le masina fou o Tesema.
“Ou te faafetaia le Faamasino Sili le Atua i le faaiuga ua aumai, ma sa tuu lava i le Atua lenei faamasinoga”, o le finagalo lea o le tina o Sela ina ua maea ona lau le faaiuga o suesuega o molimau sa feagai ma se laulau o faatonu.
O le tuanai o le tolu aso o suesuega o molimau a leoleo na faaleaoga ai e le faamasinoga le isi moliaga o le ulugalii, o le faia o ni gaioiga faataulaitu poo le witchcraft ina ua le mafai e leoleo ona tuuina atu ni molimau e faamaonia ai lea tuuaiga poo le moliaga.
Faaalia e le tina o Sela talu lava ona maliu le tina o Afiafi Aoaga o Luatuanuu ma Falesiu lea na mafua ai ona molia i laua e leoleo, e lei toe faatinoa lava le la galuega o le fofoina o ni gasegase e faaaoga ai vai Samoa. Fai mai Sela o laua ua i totonu o se isi ekalesia ua maua ai le faaolataga, ma ua lafoai ai ma le la galuega.
“E leai lava se isi fomai e faamaloloina soo se ma‘i ua na o le Alii”, o le tala lea a le tamaloa o Felavasa‘i.
O Ianuari o le tausaga nei 2009 na maliu ai le tina o Afiafi Aoaga o se mau paolo i le nuu o Faleasiu i le tuanai o se togafiti faataulasea a le ulugalii, na tafu ai se vai vevela na sasaa i se paelo ona ave lea o le tina ua faatietie ai i luga ae faapulou i se ie palanikeke mafiafia.
O se togafiti na faaalia e le tina o le toalua o Afiafi i lana molimau i le faamasinoga, e tutuli ese ai aitu o le aiga, o le tina ua maliu e pei ona faamatala atu e le tina o Sela.
E lei atoa se aso talu ona maea lea gaioiga ae tili le tina o Afiafi i le falemai i Motootua lea na maliu ai ae faatoa tuanai le lima minute talu ona taunuu e pei ona taua i le molimau a le alii fomai na vaaia le gasegase.
O le tina o Sela sa faia uma togafitiga ae o lona toalua o Felavasa‘i o lana galuega o le tataina o vai.
O se faasalaga faafalepuipui o loo aiaia mo le solitulafono o le faaoo o ni manua le actual bodily harm lea ua faamaonia faasaga i le ulugalii. E lei faailoaina mai e Sela ma Felavasa‘i le ekalesia fou ua tapuai ai nei, lea ua mafua ai ona taatia le la galuega faataulasea ae ua agai i le fomai sili o le Atua na te faamalolo soo se gasegase.
E tele nisi gasegase sa fofo e le ulugalii ma manuia e pei ona faaalia e le tina o Pereise i lana molimau, na manuia ai lona manava tiga sa fofo e le tina o Sela. O le mafuaaga foi lea na sulu i ai mo se fesoasoani ina ua gasegase le fafine o Afiafi le toalua o lana tamatama. O se tasi o susu o le tina sa iai se fula le mafuaaga o lona gasegase.