‘E lē o se laei e faalialiavale ai, ae o le laei e poto ai’…
taitaifono Fono Ekalesia Soofaatasi
O le leo o le fiafia ma le olioli, ae taotao tua mai ai lagona o le faafetai ina ua laei e alii e toaono le Tatau a le tama tane Samoa ae o tamaitai e toalua ua laeiina le Malu. O le susuga Su‘a Suluape ma ona alo sa feagai ma le galuega e fā vaiaso.
O le faletalimalo o le Orator i Siusega e lata i Tanumapua na faatino ai le taina o tatau ma malu lea sa Ulu tatau ai le alii pule o le faletalimalo o ia foi ma lona faletua e ana lea pisinisi le susuga Leiataua Taii Jerry Brunt, o se tasi foi o alii loia i le atunuu.
Na faamatala se tasi o sogaimiti sa aofia ai i le au tatā ua sama ma umusa a latou malofie, le tofa Pauli Toetu Tuia, e ese lagona na amata le galuega o iai, ese lagona ina ua mae‘a. “Ua pei lava le matou mafutaga o se aiga e tasi, aemaise lava o le galuega a le susuga Su‘a ma ona alo. O le taimi lenei ua matuā lagona lava le fiafia ua ou tauaveina le malofie le laei o le tama tane Samoa”.
O le taitaifono o le Fono a Ekalesia Soofaatasi le afioga Kasiano Leaupepe, na taitai i le sauniga na sama ma umusa ai tatau. O se sauniga na lava tapena e le taitaifono auā ua lava lona silafia i le tatau auā o loo ia laeiina foi. “E lē o se laei e faalialiavale ai ma mimita, ae o le laei ia poto ai ma iloa ai tautala ma faatino le tautua”, o se vaega o upu tima‘i a le taitai o le sauniga.
Na faaalia foi e Kasiano ua tele alii talavou ua latou laeiina le malofie ae e matuā lē silafia se upu o le faasamoa i tu ma aganuu masani. “Leaga o lea ua uma ona ta tou tatau, ae o le mea sa tatau ona muamua fai, o le ta muamua o tou gutu”. O le uiga o le saunoaga a le taitaifono o se tasi foi o matai o le atunuu, sa tatau ona a‘o muamua le tautala a le au tatā ona faato‘ā sosoo ai lea ma le taina o a latou tatau.
O faaaloaloga masani a le atunuu na maau i ai le toalima o alii ma tamaitai e toalua na umusa ma sama a latou malofie, lea na tatala ai ie o au‘afa ma moegalafo ona o le faaaloalo i le matua o faiva ma ana fesoasoani. O tupe foi ma le palapala malo na maau i ai.
O le susuga Leiataualesa Niuapu na tu tootoo mo le au tatā, ae o le tofa Auimatagi na fai ma fofoga tau momoli o Su‘a Suluape ma ona alo e molimoli ane le faafetai e tusa o le faaaloalo ua maualuga.
Na faaiu le polokalame i le taumafataga na saunia e aiga ma le faletalimalo o le Orator ona ta‘ape ai lea o aiga ma uo sa auai.
