Oloo faasolo nei e le Ofisa o Aoga se polokalame oloo ofoina fua mo faiaoga ma mātua. Ua ta‘ua o le “INCREDIBLE YEARS” poo le “TAUSAGA SILI ONA TĀUA”. O le polokalame a mātua e faapitoa i tamaiti e amata mai pepe seia oo i le 8 tausaga, peitai, e talafeagai mo soo se tamaitiiti.
O le matutua lava lea o alo ma fanau oloo faamaumauina i suesuega, e tusa ma le 85 pasene o le mafaufau e atinae ai.
O le ala foi lea o le faamalosia e le malo ma le Ofisa o Aoga, o le auai o alo ma fanau i Aoga Amata, ona e faavae mai i suesuega aemaise faamaumauga o le sologa lelei o le taumafai o alo ma fanau sa auai i Aoga Amata, pe a taunuu atu i Aoga Tulagalua.
O le vaiaso na tuanai atu nei i le Aso Tofi 28 Iuni 2012, na faia ai se faauuga o ni isi foi ua mae‘a la latou polokalame sa faatinoina mo le 16 vaiaso.
O ni isi o le au faauu sa aofia ai le faletua ia Irasa Lemoe, Vaseroi Gatoloai, Pulemau Areli, ma le tamaitai o Peleate Shalom Fata.
O lenei polokalame, oloo aoaoina ai i latou i ni auala e mafai ona latou maua ai le toafilemu, ma faaaoga ai ni auala talafeagai e gafataulima ai ni amioga a le fanau, e manatu e le talafeagai.
E le gata foi i lea, o le faaaogaina o le gagana faalaeiau ma le faatupu lagona o le manumalo i alo ma fanau, ae le o lagona o le toilalo, oloo tele ina aafia ai nai alo ma fanau, oloo mafua ai le tele o i latou ua oo atu i ni isi o amioga e le taliaina e le toatele o tatou.
O le talitonuga o le polokalame, a lelei ona faafailele ma tapue amioga a le fanau a o laiti, e toatele e faafiafiaina, ma e maua foi se taunuuga manuia.
O le ala foi lea o le iai o polokalame faapitoa mo faiaoga, aua ua matauina foi, o uiga o faiaoga e faaalia i le fanau, o faaupuga o le toilalo ma le taufaifai, o le mafuaaga lea o le tele o le faaletonu i totonu o aoga, oloo tuuaina ai pea fanau, faasolo atu ai i mātua, ma oo atu ai ina faasinosino lima i aiga, seia oo atu ai lava ina tuuaina ai tu ma aganuu ma atunuu e omai ai.
O vaega sili ia ona ogaoga ma faatupu ai lagona o le lē fia taumafai mo se manuia. O le amataga lea o amio faalii, ita, ma faaupu ai ua le faaaloalo. O le mafuaaga foi lea, o le tele o faaletonu i le va o faiaoga ma tamaiti aoga.
Manatu o se tasi tagata suesue, “O lou faaaloalogia e te galue ina ia maua, ae le o lou nofonofo ma faatalitali.”
Oloo tele foi le faamoemoega o nei polokalame ina ia faatinoina i totonu o ekalesia, oloo auai le toatele o fanau i autalavou ma aoga Aso Sa.
O le faamatagā i luma o isi tamaiti, o upu faifai ma le gagana e maua ai lagona o le toilalo, aemaise le faatusatusa ma uiga faaalia o le faailoga tagata ma le manatu faatauvaa.
O nei uiga uma, e aafia ai le tamaitiiti i lona olaga atoa, aua ua manatu ane, “E le o au o se tagata lelei, e maimau le taimi e taumafai ai, e le toe fia faalogo mai se isi ia te au.”
O auala sa outou soifua ae ai ma ou ola mai ai o le fasi ma faaupuga mamafa, ua le o toe talafeagai i lenei foi vaitau o le soifuaga, ma le siosiomiaga oloo tutupu ae ai o outou alo ma a matou fanau. Ua tele naunau lu‘i oloo feagai ma fanau i lenei atunuu oloo ua tatou aumau ai.
Afai ua manunu le toau ona o se lagona vaivai o le tusitala, ia malu ave i fale i o outou finagalo, o naunautaiga lava ina ia maua e nai alo ma fanau ni soifuaga e tumu i le faamalosiau ma le faalaeiau, ina ia avea ai ma ni tagata e fiafia e sailimalo ma tausinio mo le mea sili.
Manuia le feagai ai ma galuega o lenei vaiaso.
