La‘u faananā fugafuga ma mama‘o i Saina

E toalua ni alii, o ni tagatanuu mai Saina ua sauni e tulai i le faamasinoga i Samoa e tali i o la moliaga faasolitulafono e tusa ma aiaiga o le Tulafono o faigafaiva. Ua mafua i ni tuuaiga e faapea, ua la ave i fafo fugafuga ma mama‘o o ni figota mai le gataifale o le atunuu, o loo tapu ona toe fagotaina mo ni faiga faapisinisi.
O se suesuega na faia e le ofisa o faigafaiva na maua ai se pusaoloa poo se container o fugafuga ma mama‘o ua uma ona faamamagoina ma ua sauni e ave i Hong Kong, na faapea ona mafua ai ona masalomia ni tagata mai Asia i le faatauina atu i fafo o nei figota ae o loo faasa talu mai le tausaga e 1997.
Faaalia e le Pule Sili lagolago o le Matagaluega o Faatoaga i le vaega o faigafaiva, le susuga Mulipola Atonio, o suesuega ia na maua ai ni alii Saina se toalua o loo faia se la pisinisi i Samoa o loo fagotaina nei meaola o le sami ma faatau i fafo.
O alii Saina ia ua molia, ae o le alii Saina na masalomia i le pusaoloa na taofia e lei aveina i Hong Kong na toe mafai ona ia tuua le atunuu a o lei faia i ai se suesuega ma molia.
O le tausaga na tea nei na aliali mai ai lea soligatulafono.
O loo iai popolega o le vaega o faigafaiva i le ono toe faaitiitia o fugafuga ma mama‘o e maua i le gataifale pe a toe fagotaina nei figota mo ni faiga faapisinisi, e fua lea i le suesuega na faia i le tuanai o le 12 tausaga mai le 1980 i le 1997 sa mafai ona faatau ai i fafo nei figota.
O suesuega na faia i lea vaitaimi na iloa ai ua faaitiitia, o le mafuaaga lena na fai ai le faaiuga a le Malo i lea vaitau e taofia loa ona toe fagotaina ia figota o le sami i le faamoemoe e faatau pe maketi atu i fafo.
O alii mai Saina ua molia nei i le faia o lea tulaga, o loo aafia i le faagaioia o se pisinisi faleoloa i se vaega o Vaitele tai.
O le toe aliali mai o nei gaioiga faapisinisi i le faatau i fafo o nei figota ua silasila ai le ofisa o faiga faiva e toe teuteu le tulafono e faasino i aiaiga o gaioiga tau faigafaiva i le atunuu. Faaalia e le Susuga Mulipola Atonio, o le a faamaioio lelei i ni teuteuga le tapu ona toe faia lea tulaga, ma o le a faamanino ai foi ma faasalaga talafeagai.
E le itiiti ifo ma le $10,000 se faasalaga tupe o loo aiaia i le tulafono o iai nei mo se tasi e faamaonia lona le usitaia o poloaiga a le ofisa o faigafaiva, faapei o le tapu faasaga i fugafuga ma mama‘o faapea ma maisu auā e tasi lea figota e manaomia tele i atunuu Asia aemaise Saina mo mea taumafa i pisinisi faleaiga.