O le po o le Aso Lua na tea nei na faatumulia ai le Maota o le EFKS i Owens Street i Newtown i le maimoaina o le koneseti o faafiafiaga matagofie a le aulakapi a le aoga a Nuuausala.
O le auga o lenei koneseti o se sailiga tupe mo le autaaalo a o latou faagasolo ai taaloga ma isi aulakapi i le aai tele i Aukilani.
Na mae‘a le koneseti ona toe malaga loa lea o la latou pasi auā le faamoemoe tele i taaloga faapitoa o le a faagasolo ai.
O se lipoti na maua mai se tasi o le aumaimoa na auai i lea po, e tusa e $6,000 le tupe na maua i le aaofoai o le aumaimoa aemaise o aiga o nai tamaiti na latou lagolagoina lea faamoemoe.
O le taimi o lenei lipoti na ta‘ua mai ai taaloga e lua ua mae‘a ma na manumalo ai le aulakapi a Nuuausala i ia taaloga.
O loo faasolo pea le faagasologa o fetauiga ma ‘au i Aukilani ae foliga mai e malosi tele le taaalo a tamaiti e ola i le ‘ulu ma le talo i Samoa nai lo tamaiti o le pateta ma le susu a Aotearoa.
Talosia le faigamalaga ia maua le malolosi o alo o si o tatou atunuu e fou mai i le malulu o le timu ‘aisa ma ea flu o lenei atunuu.
