Koleni malosi Vaiala mo le taamilosaga lakapi i Fiti

E fā masina o loo tapena ai nei le aulakapi taitoafitu mai le kalapu o le Ulalei a Vaiala i le taamilosaga taitoafitu faavaomalo o le Fiji Coral Coast Sevens e faia i Fiti i le masina o Novema o le tausaga nei.
O le kalapu lakapi a Vaiala o se tasi o kalapu malosi ma maualuga le faatinoga o le taaloga i le iuni lakapi faaitumalo a Apia. E le taumatea o le mafuaaga foi lea o le fia tausinio o sana aulakapi taitoafitu i le taamilosaga i Fiti lea o le a tausinio ai foi ni ‘au mai isi atunuu e pei o Niu Sila ma Amerika Samoa.
O le au taitoafitu a Vaiala na fetaui ma le ‘au o le Red Rock a Fiti i le taamilosaga fitu faavaomalo a le iuni lakapi a Amerika Samoa ia Aperila o le tausaga nei. Na manumalo ai Vaiala i ‘ai e 14 i le 12 ma o le taamilosaga lea i Fiti ia Novema e mautinoa o loo sauni mai i ai le ‘au o le Red Rock a Fiti ina ia toe fetaui lava ma Vaiala.
O le ‘au a le afioaga o Laulii i Amerika Samoa o loo valaaulia foi i le taamilosaga lea i Fiti ia Novema faapea le aulakapi taitoafitu o le Pakuranga United mai Aukilani Niu Sila. O ‘au nei e tolu e faapea mai se pepa o faamatalaga na manumalo i le sailiga o aiā tau kalapu lakapi e tausinio ai i le taamilosaga lea ma e leai nisi faamatalaga auiliili pe iai nisi ‘au mai isi atunuu o le Pasefika ua maua lea aiā poo rights e ulufale ai i le taamilosaga o le Bayleys Fiji Coral Coast sevens tournament.
Ua valoia o nisi o tama o le au taitoafitu a le Manu Samoa o le a tausinio i le ‘au a Vaiala o loo tapena e pei o Alatasi Tupou, Lio Lolo, Fautua Oto, Patrick Faapale ma Falemiga Selesele. Peitai e lei mafai ona faamaonia mai e le kalapu a Vaiala pe taunuu ia valoaga.
O le ‘au a Laulii i Amerika Samoa na sola ma le siamupini o le ipu faaofuofu le bowl i le taamilosaga o le Sisigafu‘a a Amerika Samoa ia Aperila lea na sola mai ai Vaiala ma le siamupini.
O le itu mautinoa o se tasi lea o ‘au lelei mai Tutuila ua siitia foi lona tulaga i le faatinoga o le lakapi auā o le a saga tofotofo atili lona lelei i le taamilosaga
lea i Fiti.
O le aulakapi taitoafitu o le Pakuranga United mai Aukilani na manumalo i le siamupini o le taitoafitu i le taamilosaga taitoafitu a kalapu a iuni faaitumalo a Niu Sila ia Fepuari o le tausaga nei e pei ona faailoa mai ma e lē o se autau faataitai auā na ta‘ua o le Olopeleki lava lea a Niu Sila ua sauni ane mo le taamilosaga.
E iai le isi taamilosaga lakapi taitoafitu a le Bayley’s Fiji Coral Coast Tournament e faia i New South Wales i Ausetalia a o lei faia le taamilosaga mulimuli i Fiti ma ua faaalia o le isi lea taamilosaga o le a tausinio muamua ai nisi o ‘au a Fiti.
Ae o le taamilosaga lava ia ia Novema ua ta‘ua o le a iai foi ma le tausinioga lakapi taitoafitu mo le ituvai o tamaitai lea e valu ‘au sa tausinio i le tausaga ua mavae ae o le tausaga nei o le a siitia ma e lei faamautuina mai le numela. O taaloga o sosoo ai nei a le Olimipeka lea e faia i Brazil i le tausaga e 2016 o le a faia ai ma tausinioga lakapi fitu mo le sailia o le pine auro, siliva ma le apa memea.
O le talitonuga o le mafuaaga foi lea o le naunau o atunuu o le lalolagi e atinae le lakapi taitoafitu ona o lea o le a toe ofi i taaloga a le Olimipeka.
O le ipu o le lalolagi talu ai nei i le lakapi taitoafitu na molimauina ai le siitia o le lelei faatino e nisi o atunuu e pei o Zimbabwe o le lakapi fitu faapea Filipaina o ni atunuu sa lē aliali a‘e o latou igoa i ni taamilosaga lakapi faavaomalo i tausaga ua mavae.
E tasi lava le auga o le auai o nei atunuu o le Olimipeka i le tausaga e 2016. Talosia o le atinaega o le lakapi taitoafitu i Samoa e ala i le taumafai e faaleleia vaega o loo faaletonu i le tatou ‘au taitoafitu o le a mafai ona saga siitia ai le lelei.