Tapena Mr Gago e tatala lana album Kerisimasi i Aukilani – Aso Faraile
O le musika ma le lagiina o fatuga fou e a‘e mai i lea vaitau ma lea vaitau, o se matatia e lē faigofie ma asa gatā lona faatinoina. Ae peitai ane, o se faiva foi e matuā iloga ona faamalieina i le tulaga o le faalauiloaina ai o taleni ma tomai a e latou te faatinoina lenei faiva. E amata mai lava i le faaupuina o mafaufauga e faatino ai se fatuga, o le faanotaina ma teuteuina i masini ma mea faaili faaonapo nei seia oo lava i le taimi e faalauiloa ai ma kilivaina atu i luga o fata a faleoloa o loo latou maketiina lipine pese auā le faamalieina o le faafofoga ale atunuu.
O musika talafeagai ma vaitau taitasi o le tausaga, o le tasi lea o tulaga e faapitoa i ai le lagiina o fatuga fou. O lea foi le mafuaaga ua a‘e ai se tofā i le susuga ia Mr Gago, se tasi o tamalii lauiloa foi i lenei taleni, mo le faalauiloaina o lana fatuga o le Kerisimasi, ua faaigoaina ‘Kerisimasi ua oo Mai’. O lenei lava le vaitau e lē gata o le tele o mau fuafuaga a aiga, afioaga ma ekalesia e faatino ai, ae e talitonu o se vaitau foi e ao ona toe tomanatu ai i aluga o le tausaga o le a mavae atu nei.
O le faamoemoe mo le tatalaina o le fatuga o le Kerisimasi a Mr Gago o le a faatinoina lea i le nofoaga o le Paradise Club i Otara i le afiafi o le Aso Faraile nei, aso 21 Tesema 2012.
O le a faafiafia ai foi i lea faamoemoe nisi o tamalii iloga i le musika e pei o Joe Failua, Laei Soia Avauli, Shado Avia, faapea le afioga ia Tauiliili Petelo Li‘a ma se tasi foi o fetu a‘e o lenei faiva, le susuga ia Safeau Gago.
O se tulaga mataina foi i le faamoemoe o tamalii nei ona o i latou uma e tofu lava ma le fatuga (album) fou, sa faalauiloa i totonu o lenei tausaga e pei o le ‘Volume 6, Susana ma le Tauga Apu’ a le susuga ia Joe Failua, ‘La‘u Pele Ea’ (Tauiliili Petelo Li‘a), ‘Volume 6, Ua Faigofie Mea Faigata’ (Shado Avia) ‘Volume 3: Ua Na o Oe & Christmas Album: Sa Tamaititi o Iesu’ (Laei Soia Avauli) faapea le ‘Volume 4: E Lou Aulelei & Christmas Album: Kerisimasi Ua oo Mai’ (Mr Gago & featuring Safeau Gago).
O le faafiafiaga foi o loo alo atu i ai mo le Aso Faraile nei o le a tuu faatasia ai tapenaga uma sa feagai ai ma nei tamalii i totonu o lenei tausaga.
E le gata i lena, ae o le a faapea foi ona maimoa ai i se faaataga o le faafiafiaga tele o le Kerisimasi sa latou faatinoina i Ueligitone i le amataga o lenei masina ma o se faafiafiaga foi o le a mafai ona maimoa i ai i sona vaega i luga o le polokalame a le Tagata Pasifika, i le ala ata o le TV1 i le po o le Aso Tofi nei.
Sa lagolagoina malosi foi le taumafaiga i Ueligitone e le auaunaga a le Digicel Pacific, AMA Travel Consultants, BNZ (Manukau) ma le ofisa loia a le susuga ia Ted Faleauto, le CourtView Legal Chambers.
