Ua amata ona aliali le taleni a Jordan Petaia mo le Queensland Reds, ae maise ai le taaloga ma le Highlanders i le aso Toonai.
Na paga ma Samu Kerevi i le Midfield a le Reds na vaaia ai le matautia o le taalo a Petaia.
O se mea fou lea, le vaaia o le alii talavou, na’o le 18 tausaga, o fai mo ia le malae.
E lei faigofie le taofiofia o Petaia e le Highlanders, e uma ane le taaloga ua atoa le 148 mita na tamoe ai Petaia faatasi ai ma taimi e lua na sao ai i le laina a le Highlanders.
Ae e le na’o le alu i luma na mataina ai lenei alo o le atunuu ae o le pue e matautia foi. E matua tele lava pue malolosi na faataunuu e Petaia, na taofi tutu ai osofaiga a le Highlanders.
O le tuu ai o le numera 13 i le alii talavou o se tulaga matautia lea ona o le laititi o ona tausaga.
Ae ua matua faamoemoeina e le faiaoga Brad Thorn le lelei o lana tama taalo. Na ta’ua e Thorn, o le igoa lea, Jordan Petaia, o le a atili iloa lea e tagata lautele ona o le lelei ma le matautia o lana taalo.
O le mea maoa’e e ui ua 11 taaloga a Petaia mo le Reds ae e na’o le lua ana sikoa ua maua, o lona uiga o ia e faamoemoe iai isi tama taalo o le ‘au.
O Petaia e lē o se tagata taalo u’u polo ae na te faasoa tatau le poto, ae maise ai le taaloga ma le Highlanders.
O le isi o taimi na sao ai Petaia i le laina a le Highlanders na sao ai i autafa o Tevita Li le alii saoasaoa a le Highlanders, toe liliu ma Ben Smith le fulupeki matautia a le All Blacks. O se vaaiga matautia ma maoa’e.
E lē na’o Thorn o loo pati lima i le a’e mai o Petaia ae faapea foi ma le faiaoga a le Wallabies, Michael Cheika. Aua o le 2018 i le masina o Novema na filifilia ai e Cheika Petaia mo le ‘au a le Wallabies i le taaloga ma Niu Sila. Peitai na toe faaletonu lava le alii taalo i manu’aga ae ua oo i le aso o le taaloga se manu e avea ai o ia ma le tagata au pito sili ona talavou ua taalo mo Ausetalia.
I le mae’a ai o le taaloga ma le Highlanders na viivii ai e tagata faasalalau i Niu Sila ma Ausetalia le lelei o le taalo a Petaia.
O le vaaiga o le tagata e tamoe sa’o i laina, e le fefe i le faatau tino, ma le mafai ona sue avanoa mai tulaga ia e tamoe ai ma sao atu i le laina o se tulaga manaia tele lea mo le Reds ma Ausetalia.
E lē na’o le polo i lima e lelei ona tauave e Petaia. Na faasino lima Drew Mitchell, tama tuai a le Wallabies i le taimi na pue tu ai e Jordan le tagata ta’uta’ua a le Highlanders ma le All Blacks o Shannon Frizell. Na matua pue malosi e Petaia ia Frizelle ma uma ai lena finauga i lea taimi.
Ae o le isi tulaga lelei o le auai o Petaia i tulimanu uma o le taaloga.
E pei e iai lona poto-masani mo le taaloga e iloa ai e ia ona faitauina le tulaga e tatau ona iai ae e lei oo atu le taaloga i le itu malae.
O Jordan Petaia na fanau i Victoria ae na ola a’e i Pirisipeni. O iina na amata ai ona taalo mo le Brisbane State High School 2013-17.
Na amata taalo ai loa mo le Queensland Country i le 2018 ma filifilia ai o ia mo le ‘au a le Reds. E 11 taaloga ua mae’a mo le Reds i le tulaga o le uigi ma le fulupeki.
O le tumutumu o lana taumafaiga i le 2018 o le filifilia lea o ia mo le Wallabies i faaiuga o le tausaga. A na leai manu’aga se manu ua tasi lana taaloga mo le Wallabies.
E mautinoa le auai o le alii talavou i le ‘au a Ausetalia mo le Ipu o le Lalolagi i Iapani i le masina o Setema.
