John Wesley – Ioane Uesele – Vaega 1

E le taumateina o Ioane poo (Sione) Uesele o se tasi o toa manumanu o le tala lelei i le talafaasolopito o le Ekalesia Kerisiano. Faatasi ma lona uso o Charles Wesley poo Siaosi Uesele e pei ona silafia ai e lo tatou atunuu.
O lenei auso e taulamua i le asa ina o le gasu o le taeao aua le tulai mai o le Ekalesia Metotisi.
Sa lauiloa Ioane i lona folafolaina o le Afioga a le Atua peitai o Siaosi sa lauiloa i le agavaa musika e ala lea i lona fatuina o pese mo viiga o le Atua.
O le aso 28 o le masina o Iuni i le tausaga 1703 i totonu o Epworth i Egelani na soifua mai ai Ioane e ala mai i ona matua o Susana ma Samuelu Uesele.
O Ioane o le tamaitiiti lona sefululima lea o le fanau. O lona tama o se alii aoaoina lelei ma o se faifeau foi i le Ekalesia Egelani. O le tina o Ioane, le tamaitai o Susana, o ia o le tamaitiiti lona luasefulu ma le lima o le fanauga a ona matua.
Na soifua mai Susana i se aiga e faapea foi ona aoaoina lelei. O lona tama foi o se faifeau ma o se taitai i le faalapotopotoga ua taua o le Puritans poo le Puriteni. O i latou na sa le atoatoa lo latou fiafia i le aoaoina o le Afioga a le Atua i totonu o le Ekalesia Egelani atoa ai ma le faatinoina o le tele o sauniga ona ua tautu i tu ma aga faalelotu ae ua le faia ai le finagalo o le Atua.
O lea na mafua ai loa ona latou faamavae mai le Ekalesia Egelani ma faatuina lo latou lava ekalesia. Talu ai ona o le fefe i le Tupu ma le sauaina o i latou na mafua ai ona sosola i latou ma agai i Amerika ma faasalalauina ai le latou talitonuga.
O Ioane e tupuga mai totonu o se aiga lotu ma o se aiga faatuatua i le Atua, o se vaega taua tele lea i le fofoaina o lona faatuatuaga ma lona naunautaiga i le folafolaina o le finagalo o le Atua.
E tele lava le lamatia o le soifua o fanau i lea vaitau aemaise lava i faamai ma faalavelave ae tuai se togafiti ma leai se fesoasoani e maua.
O le lima o tausaga o Ioane na mu ai i le latou fale a o iai i totonu.
Na faasaoina mai o ia i lenei faalavelave peitai na le mafai ona tuua i le mafaufau o Ioane le ata na ia vaaia o le mumu saesae o le afi.
E toatele nisi e manatu e faapea o lenei faalavelave na avea o se faailoilo ia Ioane i lona valaauina o se failauga o le tala lelei, ina ia faasaoina mai tagata mai le faafanoga i le afi i Seoli.
Na faapea foi ona manatu ai ma ioeina e Ioane, na mafua ona faasaoina o ia e le Atua mai le afi ona o loo iai le faamoemoe ma lona valaauina.
Na le alo tamala matua o Ioane i le aoaoina o le fanau toatele. O le galuega lea sa nafa tele ma le tina ona o le manatu o le lumanai lea.
Na aoaoina uma lava tamaiti i le auala e tasi. O le taumafai lea ia iloa faitau tusi i le taimi e amata ai ona savali le tamaitiiti.
Ina ua atoa lona sefulutasi, sa aoaoina o ia i totonu o Lonetona i se aoaoga lea na aoaoina ai e le gata i le ola faaleagaga ae faapea foi le tapenapena ma ola mama. Na maitauina e faiaoga se agavaa faapitoa ia Ioane, o le iloa lea fuafua ma faavasega i lona mafaufau ni
tapenaga poo le faamaopoopoina o ni mea.
Na faaauauina ana aoaoga i le iunivesite o Christ Church Oxford University ma faauuina ai o ia o le faifeau i le tausaga e 1728.
O le upu a le Tusi Paia ua lausilafia uma e soo se Samoa e faapea, ‘Ia aoao le tama e tusa ma lona ala, a matua e le toe tea ese ai lava.’
Ua matua faamaonia i le soifuaga o Ioane le moni o lenei fuaiupu.
I le ola faaleagaga na aoaoina ai Ioane ia iloa tu, iloa mafaufau, iloa faavasega, iloa galue faatasi ma isi.
O mea nei sa aoaoina mai i le tina o Susana ona o le toatele o tamaiti i totonu o le aiga e tasi. Na matua tausisi Susana ina ia matua lelei ona faavasega mea uma i totonu o le aiga.
O lona ola aoaoina i le mafaufau ma le afioga a le Atua sa faapea foi ona le tea ese mai ai ina ua matua.
O lea ituaiga o aoaoga na faapea foi ona tapenaina ai o ia mo lona valaauina.
Ina ua tulai mai Ioane Uesele o se taitai i totonu o le Ekalesia, sa faapea ona vaaia tulaga uma nei. Na tapenaina e Ioane le tele o faalapotopotoga i totonu o Egelani, o Uelese, o Sikotilani faapea foi ma Aialani.
O Ioane foi na ia fuafuaina ma faatuina tamai kulupu e aoaoina ai le afioga a le Atua ma tapenaina ai le ola faaleagaga o tagata.
O Ioane na aoaoina ma auina atu le tele o failauga i le lalolagi e lei aoaoina muamua i le auala masani o faifeau i aoaoga faale-Tusi Paia.
Sa faapea foi ona tapenaina e Ioane tagata ina ia fesoasoani i le talaiina o le Tala Lelei e ala lea i le fafagaina o tagata ma vaaia i latou o mamai.
O le faavasegaina uma o nei galuega ma aoaoga o se oso na e le taumate na aoaoina mai i lona aiga.
Na uigaese le tulai mai o Ioane Uesele i totonu o le Ekalesia ona na maitauina le iai o se agavaa ma se meaalofa faapitoa e mafaufau ai i fafo atu o le mea ua masani ai le Ekalesia Kerisiano.
I le vaiaso a sau o le a tatou matamata i le taimi na faavaeina ai le Ekalesia Metotisi i lalo o aoaoga ma faataitaiga a Ioane Uesele.
O le tausaga e 1735 na folau atu ai i Amerika Ioane ma lona uso o Siaosi Uesele i le malo o Amerika, ona o se valaaulia mai le taitaiau o Peretania o James Oglethorpe. O ia lenei sa ia faatuina ma faatulaina aai ma kolone o le malo o Amerika ae avea pea o ia ma sui o le malo o Peretania.
O le finagalo o James ina ia tatau ona iai se faifeau e nofo mau i totonu o kolone fou ua faatuina. O lea na ia valaauina ai Ioane ma lona uso o Siaosi i le galuega.
O le faigamalaga lenei na feiloai ai Ioane Uesele ma tagatanuu na folau mai i le nuu o Moravia poo le atunuu o Czeh Repulic, le atunuu o loo faapea ona tuaoi ma le atunuu o Polani. O nei tagata na lauiloa i latou ona o lo latou talitonuga ma le faatuatua maumaututu i le Atua.
O ni tagata e malolosi le ola faaleagaga ma le talitonuga i le ola faapaiaina mo le Atua. O le aoaoga faaleagaga o tagata Moravia e afua mai i le alii faifeau poo le alii misionare foi o John Hus, lea na fasiotia faamaturo ina ua susunuina atoa lona tino a o maimoa i ai tagata i le tausaga e 1415 ona o le le faafiti i le tala lelei.
Ua amata ona avaga tele le loto o Ioane Uesele i le ola faaleagaga o nei tagata aemaise lo latou alofa faamaoni i le Atua e leai se mea na te taofia.
O le talitonuga lenei ma naunautaiga i le loto o Ioane Uesele na tele se sao i le mataupu silisili na aoaoina e Ioane, atoa ai ma le amataga o le lotu Metotisi.