E ui i le tele o faitioga ma le tau faamatau o tagata i le galuega a le Atua ma le valaauina o Ioane Alesana Dowie peitai e le mafai ona foi ai le mea moni ona o le tagata ua valaauina e le Atua.
Ua faateleina le lauiloa o Ioane Alesana e tagata aemaise lava o totonu o Amerika. E oo i tagata lauiloa ma maululuga o le malo ua faapea nei foi ma le alii faifeau.
O nisi o fili o Ioane ua maliliu. O nisi ua lokaina i falepuipui, o nisi foi o e sa leo tetele lava i le faaleagaina o Ioane ma le galuega, ua tei lava ua mou atu ma le toe lagonaina o latou leo.
O alii mamalu o le malo sa masani ona latou lokaina Ioane, ua avea nei i latou ma e ua puipuia le alii faifeau i taimi o ana polokalame ma mea e femalagaai ai.
O le Alii pulenuu fou o le aai o Chicago o se tasi na filifilia ma palotaina e i latou o loo mulimuli i le talaiga ma le aoaoga a Ioane.
Ua le toe iai se tasi e faalavelave i le galuega talai. O magaala o le taulaga ua faia faasoloatoa ai faamalologa ma aoaoga a Ioane.
O nisi o taimi e poloka atoa ai e Ioane Alesana se vaega o le aai ae faatuina ai ni faleie tetele mo ana polokalame faaevagelia ma faamalologa.
Ua sili atu i le 1000 le aofaiga o tagata i vaiaso uma e tatalo faapitoa ai Ioane mo le faamalologa i lea taimi ma malolo i le suafa o Iesu Keriso.
O se tasi o tagata lauiloa i le malo na faamaloloina i lea taimi o le taseni o le Peresitene lauiloa o Amerika o Abraham Lincoln.
Na valaauina o ia i se tasi aso e feiloai ma le Peresitene o Amerika o William McKinley. Sa faapea ona ia faailoa atu i le Peresitene o le a ia tatalo mo ia ma le faigamalo.
Ina ua maea le feiloaiga sa faapea ona faailoa e Ioane i tagata o loo latou galulue faatasi e faapea e tatau ona matua tatalo mo le Peresitene ona o lona lagona o loo lamatia lona soifua.
E ui i nei valoaga a le alii faifeau ae sa iu lava ina tagatavaleina le alii Peresitene o McKinley i le aso 6 o Setema 1901, e valu aso talu ona maea ona feiloai atu i ai Ioane.
O le tau amataga o le senituri fou i le 1900 na pei ai Ioane o le pule o le aai atoa o Chicago, ona ua saoloto lava o ia e momoli le feau o le faaolataga a Keriso e aunoa ma se tasi e toe faalavelave.
O fale tetele sa ia faaaogaina mo sauniga. O sauniga uma e sili atu i le 6,000 afe tagata i le sauniga e faatumuina.
O le taimi lea na amata ai ona aoaoina e Ioane le taua o le galuega faaaposetolo i totonu o le Ekalesia a Keriso.
Sa ia faatautaia se koneferenisi tele ma faaigoaina o le ‘O le Galuega Kerisiano Katoliko’.
O le igoa Katoliko e leai sona piitaga ma le Ekalesia Katoliko peitai o le faaigoaina o le upu Katoliko, o lona uiga o le ‘aofaiga aoao’ poo le salalau atu i vaega uma.
O le lenei aoaoga e ui ina fou i le faalogo a tagata peitai na aoaoina e Ioane e faapea e le o se mea fou poo se aoaoga fou. Peitai o le toe faaolaolaina o le aoaoga ua leva a le Afioga a le Atua o loo i totonu o le Efeso 4:11-3.
O lea aoaoga a le Tusi Paia o loo faailoa mai ai le taua tele o le iai o tofi taua e lima i totonu o le ekalesia, e pei ona faailoa e Paulo i le ekalesia i Efeso.
O nei tofi taitasi e muamua lava le aposetolo ma le perofeta. Sosoo mai ai le leoleo poo le faifeau, o le aoao atoa ai ma le folafola poo le faievagelia.
E lei pine ae amata loa ona salalau le toatele o tagata ua auai i le ekalesia ma taliaina lenei galuega.
Ua tupu le toatele o tagata ua mulimuli nei ia Ioane. Ua lelei le tamaoaiga ma ua tele mea ua maua. Ua faapea foi ona maua le pule e faia ai le tele o mea i totonu o le aai.
Ua faapea nei ona faia ni fuafuaga faalilolilo a Ioane Alesana ina ia fausia se aai faapitoa.
Ua silafia lelei e Ioane o le a faapea foi ona tupu le vevesi ma le faitioina pe a faapea nei e faalogoina e tagata nei suiga matautia.
O lea na faia ai e Ioane le fuafuaga e faapea o le a faia se polokalame ua faaigoaina o le ‘Taua Paia’.
I lea polokalame na faailoa ai e Ioane o le a laugaina se feau faapitoa e taua o le ‘O Fomai, o le Tiapolo ma Valaau.”
Na faapea ona toatele i latou ua naunau e fia faalogologo i lenei feau ua faailoa mai atoa ai ma le polokalame.
Peitai o le autu moni lava o nei folafolaga o le manatu lea o Ioane ina ia aveesea ai mafaufau o tagata mai fuafuaga o le aai lea o le a faatuina.
A o vevesi tagata i polokalame faaevagelia a Ioane ae o loo faapea ona faatonuina ma auina atu le au fuafanua e fuaina le fanua o loo naunau i ai Ioane e faatauina.
E toe malamalama ane tagata aemaise le au faipisinisi, ua uma ona fuaina ma faatauina le 46,000 eka o fanua lea ua manatu Ioane Alesana Dowie o le a fauina ai le aai faapitoa ua faaigoaina o Siona.
Na toatele tagata na maofa i lenei galuega tele aemaise lava le au faipisinisi. Na maofa i le tomai o Ioane.
Na faatulafonoina o fale uma e fauina i le aai o Siona e le faatauina ae o le a lisiina mo le 1,100 tausaga. I lea taimi e faasa ona tagofia e se tasi i totonu o lenei aai se tapaa, poo se ava malosi, atoa ai ma le taumafa puaa.
Ua maea ane le lua tausaga ua tulai uma fale na fausia atoa ma le aai o Siona.
O lena mea na vaaia ai le pisi tele o Ioane ma ua amata nei ona faaletonu le galuega faaevagelia.
E moni lava e poto le tautai ae se lava le atu i ama.
Faaauau i le vaiaso fou
