Ua faia se ioega a le Kapeneta i le iugafono a le Komiti o Tauofoga e faatauina mai ni masini ma oloa mo nofoaga GSM e tolu a le SamoaTel mo ana fesootaiga tau telefoni, e faatau mai le Kamupani e taua o le Huawei International Ltd i le tau e silia i le $667,000 tala Samoa. O ia masini ma oloa e pei ona faailoa mai i se pepa o faamatalaga, e mo le faaleleia o le tautua a le SamoaTel i le atunuu mo fesootaiga i telefoni feaveai, lea e faapea o le 95 pasene o le atunuu atoa ua oo i ai le malosi o le auaunaga o le telefoni feaveai a le SamoaTel, le Go-Mobile. I le taimi nei, e 37 nofoaga GSM ua iai ae peitai ua toe fia fausia nisi nofoaga se tolu aua le faaleleia o lea auaunaga.
O le fesootaiga GSM a le SamoaTel, sa manumalo ai le kamupani a le Huawei International Ltd ma o le kamupani foi lea sa faatauina mai ai masini ma oloa tau fesootaiga a le kamupani telefoni a le atunuu o loo iai nei. O loo fai si televave o le alumia o le auaunaga a le tasi kamupani telefoni feaveai o le Digicel ona na muamua soo ai le atunuu, peitai ua iai molimau maumaututu ua iloa ai le amata liliu o le toatele e faaaoga le Go-Mobile a le SamoaTel ona e le gata e taugofie, ae a maea loa ona faapipii masini mo ona nofoaga e tolu o loo mafua ai le faaiuga a le kapeneta, o le a faasopolia loa Samoa atoa i lana tautua tau telefoni feaveai.
