“Ia Faaauau Ona Mataala”
A o vevesi pea le lalolagi ma femoumouai ai lagona o tagata ona o faigata ua iai le lalolagi i lenei vaitau, ua le gata i le faaletonu o le tamaoaiga, ae ua matua saoasaoa le amioleaga ma soligatulafono, peitai o le iai o ni faamanatu mai le Afioga a le Atua mai lea taimi i lea taimi mo auauna ma fanau a le Atua, ua pei o se vai mālū e faasūsū ma toe faaolaola atili ai le agaga tapuai ma le faatuatua malosi i nei aso faigata.
E mautinoa o lagona moni na sa taape ma le au usufono a le ekalesia Molimau a Ieova, ina ua faamaeaina ma le manuia lo latou faamoemoe sa tapenapena mai i ai i le tele o aso, ina ia aoaoina atili sui auai uma o le ekalesia i se polokalame faaleagaga sa taulai atu i le matua autu: “Ia Faaauau Ona Mataala!”
E tolu aso o lenei faamoemoe, mai le Aso Faraile, aso 14 ma faaiuina ai i le Aso Sa, aso 16 o Aukuso. Ma i nei aso uma e tolu, na tofu aso taitasi ma se fuaitau o le Tusi Paia sa avea ma taulaiga e matua i ai lena aso.
O le matua o le Aso Faraile, “Ia Outou Nofosauni” na sii mai le Mataio 24:44. O le matua o le Aso Toonai, “Ia Faaauau Ona Outou Mafaufau Lelei ma ia Mataala” na sii mai le 1 Peteru 5:8. O le matua o le Aso Sa, “Ia Faatalitali Pea i ai … e Lē Faatuai Mai” na sii mai ai le Sapakuka 2:3.
O tauaofiaga faaletausaga nei a Molimau a Ieova e auai uma mai i ai a latou faapotopotoga Samoa o loo i Niu Sila nei, i Aukilani, Ueligitone ma Kalaisetete, ma e tasi le auga o nei tauaofiaga, ina ia toe faamalosia atili le soifua tapuai o ona sui auai e ala i lauga faale-Tusi Paia lea e aofia ai ma ni faatalanoaga ma faataitaiga.
O faatasiga foi nei a le ekalesia e tulimataia ai le faatinoga o se tala (drama) faale-Tusi Paia lea e telē se lesona e tatau ona aoaoina mai ai e le aofia.
O le tala sa faatinoina i le Aso Sa, na faaautu i le matua, “O Lou Uso Lenei na Oti, a ua Toe Ola Mai”, sa faaata mai ai se tasi o faataoto o i le Tusi Paia, i le uii faamaumauoa.
O le isi vaega taua o nei faatasiga a le ekalesia, o le papatisoga, ma e toa 14 sui fou o le ekalesia sa molimauina i le Aso Toonai le faailogaina o le tuuina atu o o latou soifua e auauna mo le finagalo o Ieova lo latou Atua.
O le tausaga lenei e tusa o polokalame faagasolo a le ekalesia, e toe foi uma ai i atunuu moni i latou ua faataulaga o latou soifua e auauna talai ai i atunuu ese poo misionare e pei ona faaigoa ai. O se tasi lea fiafiaga na faaopoopo i lenei faatasiga, auā sa toe taliu mai i Niu Sila nei i latou o loo galulue faamisionare i isi atunuu e pei o Samoa, le uso ma le tuafafine ia Leva & Tenisia Faaiu, faapea Natanielu & Pelenara Phillips, ma maua ai se avanoa e toe asia o latou aiga ma usufono faatasi ma o latou uso ma tuafafine faaleagaga i Niu Sila nei.
Ua masani tagata, o le ekalesia Molimau a Ieova e mataulia i le latou galuega talai mai lea fale i lea fale, ina ia talanoa faale-Tusi Paia i tagata, ma tuuina atu ni tusitusiga faale-Tusi Paia e faalautele ai na talanoaga. O a latou tauaofiaga foi nei e tulimataia ai le tatalaina mai o nisi lomiga fou, e pei o se tusi ma se polosiua faale-Tusi Paia, ina ia fesoasoani atili i la latou galuega talai aemaise foi le tomatauina atili ai o lo latou soifua faatuatua.
Ua taape nei la le fua manusina ma ua lele foi le gogo ma si ana i‘a e pei o ia upu a le atunuu, seia aulia foi le taimi lava lenei i le tausaga a sau, ma e iai le talitonuga, o nei aso atoatoa e tolu o tausamaaga faaleagaga, ua tatau ona faamausaliina ai i finagalo le matua o le tauaofiaga: “Ia Faaauau Ona Mataala”.
