Le au a le Fetu Afi na malo i au a alii

O le Aso Faraile 23 ma le Aso Toonai 24 o Aokuso na faagasolo ai le taamilosaga kilikiti sa faatautaia e le Fetuilelagi Kilikiti Tournament. Na faavaeina mai le faalapotopotoga e nisi o i latou nei e pei o Lisa Burgess, Brenda Mauigoa, Ron Burgess & Leiataua Fiona Mene. O le naunautaiga ina ia tapena ai se faavae auā o tatou tagata Samoa i Brisbane e lē gata e faaaogā taleni, ae faaolaola ai le taaloga kilikiti faa-Samoa moni e pei ona masani mai ai a’o i Niu Sila.

Na faatinoina lenei taamilosaga i le Malae o le Wynnum Manly Cricket Club, ma e lagona le agaga faafetai i le Peresetene o le kalapu, susuga ia Graham Mapri i le lagolago ma ua faatagaina ai lenei taamilosaga i le malae a le kalapu, e ui o le kitikiti faa-Samoa e ese mai foi lona faatinoina.

Na ta’ua foi e Graham Mapri, o loo iai foi lo latou nauanauta’iga e fia iloa le faatinoina o le Kirikiti a Samoa. 

O le mafuaaga lea ua tuuina atu ai le fesoasoani, e ala i le faatagaina o le malae mo le taamilosaga.

Na auai le Minisita o le Multicultural Affairs, Honourable Stirling Hinchcliffe e tatalaina aloaia le taamilosaga faapea le susuga i le tamaitai pulenuu, MP Joan Pease sa auai i le taualugaina o le taamilosaga. 

E ono ‘au a tamaitai ae fā ‘au a alii sa resitalaina e aofia ai ‘au a tamaitai e tolu na malaga mamao mai Aukilani Niu Sila i le fia auai i lenei taamilosaga faitaulia.

O ‘au sa auai e aofia ai ‘au a tamaitai e tolu mai Niu Sila. O le G.I. Katoliko – NZ, Tautua – NZ ma le Black Widows – NZ. O ‘au a Brisbane o le Fetu Afi – BNE, Teine Mai Saute – BNE, Kulture Kweens. O ‘au a alii e aofia ai le BNE Mens Fetu Afi, Tama Mai Daquabax, Kulture Kings ma Spiders. Na malaga mamao mai Niu Sila le susuga ia Faapoi Tofa e faamasinoina le taamilosaga. 

GI Katolito mai Niu Sila na malo i au a tamaitai

Na siamupini le G.I. Katoliko mai Niu Sila i le ‘au a tamaitai ae o le Fetu Afi na sola ma le manumalo i le taamilosaga a alii. E lē mafai ona taunuu se faamoemoe pe ana lē seanoa le soosootau’au mai o sponsors sa lagolago e pei o Junior Aiga & Sons Insurance and Mortgage Brokers, Uniquely Pacific Art & Design, Brenda Mauigoa ma Pollyana Magele faapea le pulenuu o le itumalo o Wynnum, MP Joan Pease.

Ona o le fia fesoasoani o le faalapotopotoga a le Fetuilelagi Kilikiti Tournament i le Samoa Victim Support Group i Kuiniselani, na faia ai foi sailigatupe a’o faagasolo le taamilosaga, e ala i taumafa na faatauina faapea foi le lūlū. O tupe na maua na faameaalofa lea mo le SCSG QLD.

O le hamper na foaiina e le tamaitai pulenuu MP Joan Pease mo le Fetuilelagi, lea na fai ai le se’i o le lūlū. Ua fuafua e toe fia faalauiloa pea lenei fesoasoani i le 2020. E iai pea le agaga o lenei faalapotopotoga e auauna ma faatino le latou taumafaiga uma i le loto alofa.