Ua na o se foe lava e faaee i le tau le tele o fuafuaga ma manaoga faivavale, pe ana lē seanoa le faatasi mai o lo tatou Matai sili i le lagi.
Ua o ni ufi e tutupu i tino lagona o le fiafia na faaosofia ai faletua o le aufaigaluega a le Pulega a Sisifo ma tina uma ina ua mae‘a le aso taupoina o lenei tausaga, o le Faamati, e pei ona asia ai maota o le aufaigaluega lea sa faasavali ai le asiasiga a le Tiakono Toeaina ma le faletua, Su‘a Vasa ma Faamomoi Su‘a ma tina uma lava.
O Pulega EFKS i le itu i Matu, o se tasi lea o pulega i le Matagaluega a Kuiniselani e pei ona taitaia e le susuga i le Toeaina Taitai, Rev Lauie ma le faletua ia Autalaga Lupematasila.
E 7 ekalesia e aofia ai Cairns ma Townsville, ae lima lava Ekalesia ma‘oti ma le malolosi i Brisbane.
Talu ai ona o le vava mamao e fuafua i le femalagaai o le Tiakono Toeaina ma le faletua, lea na faatea muamua ai le lima ae faato‘ā faamautu isi ekalesia mamao i le 2 pe a taliu mai le usugafono a le autoeaiina mai Samoa i le isi 2 vaiaso.
O le tiakono toeaina ma le faletua e fai ma sooupu e fautuaina tiakono ma tina e faamalosiau ina ia tautuana maota o le aufaigaluega, ae patino lava i le itu i le tino ma le lotoifale.
O le feagai ai ma le asiasiga o lenei tausaga na faailoa ai i le sui o le Samoa Times, le faamalieina atoatoa o le silasila i vaega uma, sa leai se mea e faaletonu.
O asiasiga tumau lava i tausaga uma e pei o vaega e faaaogā i taligamalo sa faamamafaina e iai le faatotogaina o umukuka, potu moe faapea solo, ieafu ma vaega uma faapena.
O mea togia e pule a le aulotu e pei o teugatupe inivesi poo ni fanua ma fale faatau ma taavale a le aufaigaluega. O isi ia o aseta tāua e faaopoopo ai pea le alualu i luma ma le mautu o le Pulega, e pei ona iai le maota o le Toeaina Taitai, susuga ia Rev Lauie ma le faletua ia Autalaga Lupematasila ua motu le totogiina ma ua mae‘a, e viia ai le Atua i lona Mana laveai auā sa lei faigofie.
O nisi o Ekalesia ua mautu foi maota faatau o loo galulue ai le susuga ia Rev Tapenaga & Olita Reupena, Rev Sabu & Sueileata Samoa, faapea Rev Osa Nanai ua tuumalo si ona faletua i le tausaga ua tuanai.
O loo iai le fanua inivesi e 30 eka a le Pulega i Toowoomba o se tasi o a latou meatotino, ae o loo tau saili pea se fanua e faatau mo le galuega i le taimi nei.
O Ekalesia nei ma Faafeagaiga o le Pulega EFKS a Matu: North Side – Toeaina Taitai, Rev Lauie & Autalaga (Falelatai & Fasitootai).
Gem Side – Rev Aliota & Upulasi Tiatia. Caboolture – Rev Osa & Leofi Nanai (maliu le faletua a ua mautu foi le maota faatau). Ola Fou – Rev Sabu & Sueileata Samoa (fanua & fale faatau). Pine Rivers – Rev Tapenaga & Olita Reupena (fale faatau). Cairns – Aminatapu Tauā & Elena Faafeau. Townsville – Poloaiga & Lauao Imo.
O loo malaga i le fono a le autoeaiina i Samoa le Toeaina ia Rev Lauie Lupematasila (Pulega Matu), Rev Kerita & Binary Reupena (Toeaina faatonu) ma le Toeaina o le Pulega a Saute, Rev Tauaaga Mataafa faapea le tiakono toeaina e toe talanoa ai mataupu o le fonotele i le masina o Me. E lē gata i lea o loo malaga faatasi ma le susuga ia Rev Petaia Tu‘ifao ma le susuga ia Rev Lance Tautiepa.
