Na matuai faaalia le agaga lē fiafia o le susuga ia Alex Faatau‘ī Leapai ina ua toe logo atu e fomai ma i latou e faatautaia le fusuaga, ua lē taunuu le la sipaaga ma John Napari ina ua faamaonia le maua i le gasegase o le
Hepatitis C.
O le po o le Aso Tofi na fuafua ai le taaloga i le Convention centre i Brisbane peitai sa lei faataunuuina e pei ona atofaina e fetaui ai ma le alii o Napari o Ghana. Ua faitioina ai e le susuga ia Alex sa tatau na vave logo mai e afaina le alii i le gasegase ona ua alu tupe ma tapenaga. Sa tatau foi ona maua i ana siaki i lona atunuu, peitai ua toe lava o ni nai itula amata le taaloga ae faateia o ia i se tala faalēmanuia. Masalo ai ua tau lagona se palaai o si alii i le masomasoa o le tama mai le Tuisamau, o se isi mafuaaga lea, ae ui i lea na to‘a lava le tai ma faatali sei afio mai lana susuga o le a sui tulaga ma e lē talia foi i ni vai.
Na momomo le loto i le selasela mai a si alii fusu mai Melepone ina ua faatoa taunuu lana vaa ae agai atu e faataitai mai lana laa i totonu o le maea pe faape‘ī. Ia na o le minute ma nai sekone ae amata loa ona givagiva ‘ai o le mamao o le ala na malaga mai ai.
Talofa! ua faaoo ai isi alii o Joe Lloyd le ma‘ema‘eā o le kama faipopo i lena afiafi ina ua tifa i lalo si mea ua lagona le vaivai, ae measili na alu ma faamafana lana $5000.00 e ui ina malolo si alii.
Viia le Atua na a‘e manuia faiva o le susuga ia Alex Leapai ma ua faitauina foi lenei manumalo i ana fusuaga. Ua toe malaga atu nei i Samoa si ona tuaa ia Faatau‘ī Leapai e pei ona malaga mai e molimauina le taaloga. E faaleo atu ai se agaga faafetai mai le susuga ia Alex Faatau‘ī Leapai ma nai ona aiga uma ma mātua i le lagolago mai a le atunuu i lea afiafi. Faafetai lava malo tatalo aemaise nai tina ma tamā matutua.
