Ita i lona totogi na faaoolima ai i ni alii Saina

O le alii talavou o Junior Taetusi 25 tausaga o Laulii ua nofo vaavaaia mo le ono masina, ma faatonu e totogi le selau tala i leoleo ina ua faamaonia lona faaoolima i ni alii Saina o le Konekarate mai Saina o loo fausia se vaega o le faletalimalo o Aggie Grey i Vaisigano i Apia.

I lona faamasinoga na faaalia ai na faaaogā e le taulealea le auala puupuu o le faaoolima i alii Saina e toalua ina ua lē fiafia i lona totogi. Sa galue o ia i se aukamuta o loo aofia i kamupani o loo faafaigaluega e le konekarate mai Saina.

I le tolaulauga a leoleo na ta‘ua ai e faapea, o le mataupu na tulai mai le aso 8 o Me i le 4 i le afiafi ina ua lē fiafia lē ua molia i lona totogi. E faapea na tuuina atu e i laua na aafia le totogi o lē ua molia ae sa ia lē fiafia ai ma ia tu‘iina ai le auvae o le isi alii Saina ae tu‘i le mata agavale o le isi alii ma faamanu‘alia ai.

O loo faamauina i le ripoti a le ofisa o faanofo vaavaaia le faamatalaga a alii Saina na aafia, e faapea e lei oo atu lava lē ua molia e fai se faatoesega.

Na maua le avanoa o le alii o Junior ma ia ta‘ua ai i le faamasinoga, sa alu fai lana faatoesega i le Aso Lua, 26 o Me o le tausaga nei ae sa lē talia. Ua fautuaina lē ua molia e lana Afioga le Alii Faamasino ia Fepuleai Amperosa Roma e tusa ai ma le mafuafuaga ua ia faaoolima ai.

O le mataupu na tulai mai e mafua i le totogi ae ia manatua soo se tagata faigaluega lava e tupu ai lea mataupu o le faaletonu o le totogi.

Na ia ta‘ua ai, e iai lava auala e foia ai faafitauli faapenei ma e lē tulai ai i luma o le Faamasinoga, ae ua faia e lē ua molia le auala puupuu o le faaoolima ma tulai ai le Faamasinoga. O le faaletonu o le totogi e lē o se alofaga foi o lē ua molia i lana solitulafono.

O tulaga ogaoga o lea mataupu e lua moliaga o le faaoolima ma e toalua foi tagata o loo aafia ma o manu‘aga o manu‘a mitimiti. O itu lelei o le laitiiti o le soifua o lē ua molia, ioe vave i le moliaga i le taimi muamua ma faatoa tulai foi i se solitulafono.

O le faaiuga poo le faasalaga o le Faamasino faasaga i lē ua molia, e ono masina o le a nofo vaavaaia ai. E totogi le $100 i le ofisa o leoleo i le tuuina atu ai o lea mataupu i le Faamasinoga ae lei taina le 4 le afiafi o le aso 5 o Iuni 2015.

O le lē totogiina foi o lea tino i tupe e mafai ai ona nofosala i le falepuipui mo le lua vaiaso.

Le taulealea talavou o Junior Taetusi na ioe i lona tu‘i o le auvae o le isi alii Saina, ae lavea se tasi o mata poo fofoga o le isi Saina i lana faaoolima