Iosefa: Aiga matagā

Ootia lo‘u loto ina ua faasoa se tamaitai talavou i mafatiaga sa tauaveina i ni tausaga se tele ona o le leai o se mafutaga ma lona tamā. E lei soifua ane i se aiga mautu, sa faanoanoa ma tuufesili pe aisea ua tutupu ai nei mea.

Sa tetea ona mātua ma ola ai pea faanoanoa. E tele nisi e soifua ane i ni aiga faapea, pe sili atu foi le leaga ma le malepelepe. Atonu foi e te lei ui mai ai, ae te iloa nisi poo sau uo sa ui mai ai i nei faigata. E manaomia lau tatalo.

A o lei fanau Iosefa, o lona aiga o se aiga e matagā i le vaai, e lē tatau ona fai ma faataitaiga mo nisi aiga. O lona tamā e taufaasee ma lamatia lona soifua ona o togafiti sa ola ai. O le tamā o lona tina e taufaavalea foi, ma aafia atu ai ma lona tina i natura maualalo o lea aiga. I le Kenese, sa galue ai Iakopo mo le fitu tausaga ona e fia faaipoipo ia Rasela. Uma ane ua ave faamalosi i ai lona uso o Lea e fai mona toalua.

E faitio atu Iakopo ia Lapana ae tali ane, o tu lava a le nuu e faapea, ae tuu atu le isi fitu tausaga e toe galue ai mo Rasela, ma faapea lava ona fai. Na sola ese mai lona aiga ona o faiga taufaavalea ia Esau lona uso, ae ua toe maua taitaia e faiga faa‘ole‘ole a le isi taufaavalea, le tuagane o lona tina.

Sa matuā faanoanoa Lea i lea faaipoipoga, e nonofo ma Iakopo, a ua mautinoa e lē alofa Iakopo ia te ia, e alofa ia Rasela. Ae o ai o le a tuua‘ia i lea faaletonu? Na faananau Lea ia maua sana tama, atonu e sui ai le loto o Iakopo ma alofa ia te ia. E iloa ina ua fanau lana ulumatua ma faaigoa ia Reupena, auā sa ia faapea; ua silafia mai e Ieova lo‘u tiga, o lenei, e alofa mai la‘u tane ia te au. E toaono le fanau tama a Lea, ma le teine e toatasi e igoa ia Tina.

E fanafanau Lea, ae leaga atu i ai le loto o Rasela. Na iloa e Rasela e sili le alofa o Iakopo ia te ia, ae o le faalavelave e pa. Ua tagi tautala, e sili ai lona oti. Ua avane lana auauna fafine o Pila i lona toalua ia maua ai sana tama ma tea ai lona maasiasi ma lona fuā i le va ma lona uso.

Ina ua fanau Pila, sa fiafia Rasela ma faaigoa le tama ia Tanu, o lona uiga o le faamasinoga. Toe fanau le isi tama ma faaigoa ia Nafatali, o lona uiga, ua manumalo i la misa (fagatuaga) ma lona uso.

Ina ua iloa foi e Lea ua lē toe fanau, ona ia avane foi lea o lana auauna fafine o Selepa ma avatu ia Iakopo ma fanaua ai Kato ma Asera. E iloa i uiga o igoa nei tama lagona faatautavā i le va o lenei auuso. E feaina‘i ma tauaimisa, ma fai auala eleelea e saili ai le sili.

E fanau ane Iosefa, e ese lea ituaiga siosiomaga e iai lona aiga. E fai o le lavelave o feusuaiga ma fesootaiga, ae o le vavaō ma le tauaimisa. Lē lelei le va o lona tamā ma le tuagane o lona tina, lē lelei lona tina ma lona uso, toe itagia ia e fanau a le uso o lona tina.

Pe ā ma le 6 tausaga o Iosefa, ae manatu loa Iakopo e tuua Patanarama ma Lapana, ae toe foi. O le malaga lea na nanā ai e Rasela tupua a Lapana, ma pepelo ai ina ua suesue (Kenese 31:33-35). Ua sisi‘o ma olegia lona tamā. E fai nei mea uma, ae matamata Iosefa.

Ina ua foi ma taunuu i le aai o Sekema i Kanana, sa tupu ai foi se isi mea matautia ona o le tamaitai o Tina. Na manao Sekema le atalii o Hamoro ia Tina ma ia faaleaga ia te ia, ae mulimuli ane manao e fai mana avā. Sa lē lelei ia Simeona ma Levi lea mea, ona fai foi lea o le togafiti, ma fasiotia ai Sekema ma Hamoro. E lei gata ia laua ia, ae o tama tame uma ua fasiotia, ma vete le aai uma. Sa tigā le loto o Iakopo, ae leai se mea e mafai, o mea lava sa lulū, lea ua toe selesele mai.

E ui sa molimauina e Iosefa uiga matagā uma ma le fouvale o ona uso, ae sa filifili e lē mulimuli ai i nei ala leaga. E ui foi na ia iloa le feaina‘i ma le tauimasui i le va o lona tina ma lona uso, ae lei filifili ai ia ola faapea. Sa agaleaga foi ma itagia e ona uso, ae lei liliu ai lona manatu, e iai ala e sili atu i ala faa‘ole‘ole ma le taufaavalea. Tatou te iloa mai le gasologa o lona soifua, se‘i oo lava i lona maliu, sa leai se mea sa ta‘uleagaina ai.

Toe foi i le tamaitai talavou sa tautino, o lana tala, ua faamagalo lona tamā. Ua avea lona olaga faatuatua ia Iesu ma ala o le loto fiafia, ma filifili e lē fia mulimuli i ala sese sa vaai i ai. Ua ia mautinoa, o le Atua e maua ai le toafilemu ma le fiafia i totonu o le lalolagi ua tumu i le leaga ma le agasala. Ua faigaluega nei lenei tamaitai talavou, ma avea o se taitai i le autalavou a le ekalesia.

Poo le ā lava lou amataga, pe sa lē lelei foi le aiga na e soifua ane ai, pe faaletonu ou mātua, e lē suia ai le alofa o le Atua ia tatou. Ae tatau ona filifili toto‘a ala e ui ai, ae aua le faataitai i ala leaga sa omai ai isi.

O lau filifiliga e te lelei ai, o lau filifiliga foi e te leaga ai. O Iosefa, sa filifili ala lelei e manuia ai. Soifua.