Faualo Lefau Harry Schuster faapea tamaitai tausi mai ia Luse ma Tauvale ma Leutogi Teo

O le umi ona toso o le mataupu faasaga i tamaitai tausi soifua lea o loo tuua’ia i le maliliu ai o pepe, e mafua lea, i le faaiuga o le faatalanoaga a tamaitai tausi soifua ma le loia o loo tulai mo i laua, Faualo Lefau Harry Schuster. O le faaiuga e pei ona faailoa e Lefau i le faamasinoga, ina ua mae’a ona talanoa ma vailiili lelei le lipoti, o le toe sui o le tali a tamaitai tausi soifua mai le tetee i le ioe.

Na faamalulu le alii loia i le sui faamasino sili Vuli Clarence Nelson, ina ua mae’a le mataupu ona sa taumafai e saili le faaiuga o le lipoti a fomai, ae ina ua ia maua le lipoti na faatoa maua ai loa le taimi e talanoa ai i ē ua molia. O tamaitai tausi soifua, o Luse Emo Tauvale ma Leutogi Teo, o loo tuua’ia i lenei mataupu, o se tasi lenei o mataupu tau faamasinoga ua leva ona faatalitali i ai tagata i se faaiuga.

O le Aso Lua lea na faatulaga mai ai e le faamasinoga e amata ai suesuega a le faamasinoga faasaga i le mataupu peitai, ua toe faaui i tua tali tetee a tamaitai tausi soifua ae ioe i moliaga, na tauala i le la loia, Faualo Lefau Harry Schuster. E fa moliaga tau fasioti tagata pa’ivalea, ma le moliaga e tasi o le faalavelave i suesuega a leoleo na faasaga ia laua. O Luse na toe sui i le ioe lana tali i moliaga e tolu ina ua mae’a ona tolaulau mai e le sui lesitala faamatalaga faasaga i moliaga o loo molia.

I le tolaulauga a le lesitala o moliaga e tolu faasaga ia Luse e faapea o le aso 6 o Iulai o le 2018 na ia faatino ai ona tiute faaletulafono i le maota gasegase faaitumalo i Safotu. Peitai o le faatinoga o ona tiute i le faataunuuina o le tuipuipui mo se pepe tamaitai atoa ai ma le suiina o vailaau mo tuipuipui e aunoa ma le faautauta, ua mafua ai ona uma le ola o Lannacalysta Samuelu 1 tausaga o Sasina Savaii.

O loo manino i le tolaulauga a le lesitala i le lipoti a leoleo, sa tatau ona mata’ituina lelei ma vaavaai faalelei le faatinoga o ana galuega, peitai ua lē faamaoni i le faatinoga o lana galuega. Na ioe e Luse lona moliaga muamua i le faatamala ua maliu ai le pepe muamua. O le moliaga foi lea o loo molia ai i le moliaga lona lua, ua uma ai foi le ola o pepe Lameko Siu ina ua mae’a ona fai lona tuipuipui. O le isi moliaga o Luse, o lona faalavelave lea i suesuega a leoleo i lona nanāina o faamaoniga ma faamatalaga e fesootai i suesuega.

E tasi le moliaga faasaga ia Leutogi, o le faatamala i le faatinoga o lana galuega o ia na faauluulu i ai le falemai i le taimi na tupu ai le faalavelave. Na ioeina e Leutogi le moliaga faasaga ia te ia. O le aso 17 o le masina lava lenei e fofogaina ai e le Faamasino ni faasalaga mo i laua ua molia, Luse ma Leutogi. 

E pei ona silafia o se tasi lea o faalavelave matautia na tupu i le tausaga ua mavae, ma ua tele faamatalaga ma tala ave i le faalavelave lenei. Peitai o le mea mautinoa lava, fua i le faamatalaga a le tina o Lanacalysta Samuelu e lei umi lava ona mae’a ona fai le tui o lana tama pe ā ma le 3 minute, ae vaaia loa le suiga o ona foliga, ma uma atu ai lava lona ola.

E tali tutusa lava foi ma le faamatalaga a le tina o Baby Lameko Siu ina ua mae’a ona fai lona tui, ma ua savali mai e faatali le pasi o le a toe agai ai i le latou fale ae vaai atu foi, ua sui ona foliga ma uma atu ai lava lona ola. O le aso 17 o le masina nei e lau ai faasalaga o Luse ma Leutogi i le faamasinoga.