“O se lu’itau manaia tele mo i matou o tina ma tamaitai o nuu ma afioaga, ae sa’o lelei lava le Palemia auā a nofonofoa’i matou o tina ma tamaitai o nuu ma alalafaga taitasi e lē faia galuega na valaauina ai matou, o le a lē faia le mea e tatau ona manuia ai nuu ma afioaga aemaise o matou o loo fia ulufale i tofi o le Palemene”..Tumau Tafuna’i Atoa Faasavalu
E lei ‘alo upu o le saunoaga a le ta’ita’i o le Malo le afioga i le Palemia susuga Tuila’epa L Sailele Malielegaoi, ina ua feiloai ma sui tamaitai o le Malo faapea sui o le Malo i le itupa o alii poo matai o nuu, a’o lei alo foi o ia tofi o le Malo i le faia o tiute ma galuega mo le manuia o nuu ma afioaga.
O sui o le Malo o le faalagiga lea ua sui ai le tofi Pulenuu sa faalagi ai i le tele o tausaga ua mavae. O le sao o le ituvai o tamaitai o umia ia tofi na faaleo ai e le Palemia se lu’i mo tina o le aua le tolotolo ai lava i le manatu ma le lagona o latou e gata lava i le lalaga o ietoga ma vaai fanau ae ia oo lo latou leo i le saofaiga ma le ituvai o alii poo matai o nuu o loo faia tonu ma faai’uga i mea e atinae ai le nuu. “E iai tiute tau tina masani ai o tatou nuu mai lava i le amataga, e gafa i latou ma le vaaia o fanau, e gafa i latou ma le teuteuina o aai, gafa foi i latou ma le vaaia o fanau ina ia maua le soifua maloloina lelei, faamama ma le nuu ia aua ne’i lapisia, o latou galuga na o mea na sa fai e komiti a tina i aso la”.
Na faaalia foi e le Palemia na te manatua i aso o lona laititi e ala ane i le taeao ua tata le apa e lona tina e valaau ai faletua ma tausi e feala i luga e tae le otaota ma faamama totonu o le nuu, oo latou tiute foi o le lalaga o ietoga aua faalavelave fai o aiga, aemaise o le tapena o le nuu mo taligamalo. Faaalia e Tuila’epa sa le tau faaosofia tina i ia tausaga ini faatosina ini faiga e pei o tupe ae faaosofia le loto mitamita i le lagona o le latou nuu o se nuu e mama, e amio lelei matai ma e tausaafia o latou uiga i le va ma tagata. “ Soo se faaletonu la e tulai mai e lepeti ai le nofo lelei o nuu, o outou o sui o le Malo tou te vave iai e fofo ina ia uma ai iina ia aua ne’i pisa tele aua o le po’u e tupu ai ma le papala”. O le ‘au’au o le lu’i a le ta’ita’i o le Malo i sui tamaitai o le Malo o aso nei ua siitia le tulaga o tina ma tamaitai e le pei o aso ua mavae.
O lana tuualalo ia aua ne’i totolo ai pea o latou lagona e pei o tina o aso ma tausaga ua tuanai ae ia finau ma tinou io latou tiute fai i le va nonofo ai ma le itupa o alii o matai o nuu ma afioaga. O le sui tamaitai o le afioaga o Tanugamanono le faletua o Tumau Tafuna’i Atoa sa tapa sona finagalo i lana faafofoga i le tuualalo a le ta’ita’i o le Malo mo le latou pitolaau.
“E sa’o lelei le Palemia o le tiute lea o tina e tatau ona faamalosia aemaise ia aua ne’i matou nofoai ai pea ma iai le lagona o le itupa lava o alii e faia le galuega atoa mo le lelei o se nuu, o matou foi e tatau ona milo faatasi ma le mamalu o alii ma faipule ina ia nutimea faatasi ma faaleo o matou manatu i tonu fai e lelei ai le nuu”.
O le itu foi lea na faaalia e Tumau e tauaai le tuualalo a le Palemia ona o lea ua faamalosia foi e le Malo le siitia o le leo o tina i totonu o le Palemene e ala i tofi faipule o itumalo. O nuu ma afioaga uma o le atunuu ua lua sui o le Malo o le ituvai o tina faapea ma le itupa o alii. O aso ma tausaga e tele ua mavae sa nao alii e umia suafa matai sa filifili ai tofi Pulenuu ua le toe iai lea faiga ae ua tumuai tutusa alii ma tamaitai i ia tofi o le Malo. Ua tau fai maua uma foi totogi i le faatinoga o o latou tiute fai.
