E lei mamao tele atu na faamaonia ma ua faasalaina ai nei se tina Samoa i moliaga o faiga taufaasese sa ia faagaioia ai le faiga o pepa malaga a nisi o tagata sa faatoai atu i lana auaunaga tau femalagaaiga.
Ae o lea foi ua toe agiga mai talafou se solitulafono tutusa ua molia ai foi se tamaitai Tonga, ma ua ia ioeina ona moliaga i nei faiga taufaavalea.
O le tamaitai Tonga o Khadijah Lolohea (e silafia foi i le isi ona suafa o Khadijah PIU), ua ia ioeina lana solitulafono, o lona tuuina atu o ni fautuaga ma taiala mo mataupu tau femalagaaiga, e aunoa ma sona laisene faatagaina e tatau ai ona ia faatino lenei auaunaga.
O Lolohea e alala i Mt Roskill, i Aukilani, ma o le aso 20 o Fepuari lea na tulai ai i le Faamasinoga Faaitumalo i Aukilani ma ia ioeina ona moliaga.
E tele ni sailiiliga ma suesuega sa faagasolo i lenei mataupu e le Pulega a le vaega e tuuina atu fautuaga i mataupu tau femalagaaiga, ma iu ai loa i le faia o ni moliaga se iva faasaga i le tamaitai Tonga.
Ta‘ua e le Authority Registrar, Barry Smedts, ‘e ma‘ale‘ale lava le tulaga sa iai le iuga o lenei suesuega, aemaise lava ia i latou na agai i ai suesuega e aumaia ai ni faamaoniga o le solitulafono a le tamaitai faipepa malaga, ona sa popole nei tagata, pe faamata o lo latou tuuina mai o faamaoniga e uiga i le solitulafono a Lolohea, o le a ono lavelavea ai talosaga o o latou visa sa fai.
Ma sa taumafai ina ia faamautinoa atu i nei tagata, afai ua ova aso o loo nonofo ai i Niu Sila, o le a leai se malosiaga o le Pulega e aveesea pe tipoti ese ai latou mai Niu Sila.
O Lolohea e 38 ona tausaga, ma ua faatulaga nei e tulai i luma o le faamasinoga mo le lauina o lona faasalaga, i le aso 23 o Me 2013.
O le Immigration Advisers Authority, na o i latou o loo tuuina mai ai laisene mo tagata ua agavaa e faia lea auaunaga tau femalagaaiga. O i latou foi na e mafai ona tatou agai i ai e lipoti i ai nisi o loo faia faasolitulafono lenei auaunaga, poo ni a tatou faaseā foi i le faatinoga o se auaunaga a se tasi o faufautua ua iai sona laisene.
Pe a e fia silafia poo ai tonu i latou ua iai laisene e tatau ai ona faia lenei galuega o se faufautua i mataupu tau femalagaaiga, e mafai ona e asia le latou upega o fesootaiga, www.iaa.govt.nz.
