Na ia taumafai e faamalosi se tamaitai
Ua faatonuina nei le tofa Tuilagi Namulaulu Vavae e le Faamasinoga Maualuga ina fesootai i le ofisa faanofo vaavaia mo se lipoti e fuafua i ai se faaiuga a le faamasinoga i le aso 22 o Novema 2010, i lona moliaga o le taumafai e fai se faigaaiga faamalosi ma se tamaitai 32 tausaga lona matua o Siufaga i Savaii.
Sa taofia e le faamasinoga i ni ana faaiuga muamua sa fofogaina e le Faamasino Sili le faailoaina o le suafa o lē o loo aafia ma lē ua molia.
Peitai o le talosaga a loia a leoleo i le alii faamasino o Vui Clarence Nelson ina ia aveesea ma faamuta loa lea tapu, na tatala ai loa noataga o le aufaasalalau ma faailoa le suafa o lē ua molia, ina ua tuuina atu lana tali ioe i le moliaga, e sui a‘i lana tali tetee na tuuina atu muamua.
O le aso 8 o Iuni o le tausaga ua mavae 2009 na tulai mai ai le solitulafono ua molia ai Tuilagi Vavae, o se tasi o tamalii sa avea ma faipule o le Palemene i le paeaiga o le tausaga e 1988 i le 1991, lea sa avea ai ma Sui Fofoga Fetalai o le Maota Fono o le atunuu.
Sa tauva foi i nisi o faigapalota mulimuli ane ai, peitai e lei toe faamanuiaina i le tofi faipule.
I lana tali tetee sa faamauina muamua, sa faapea ona faagasolo ai le suesueina o molimau a leoleo i le Aso Lulu na tea nei, 20 Oketopa 2010, lea sa molimau ai ma le tamaitai na aafia.
Faaalia e leoleo i le latou folasaga amata, sa agai Tuilagi i se tasi o o latou aiga i Vailele i le taeao o le aso 8 o Iuni 2009, lea na fetaui ai ma lē na aafia ma fesili i ai poo fea e alu i ai.
Na fai i ai le tamaitai o ia o loo tau alu e sue sana galuega.
Na faatonu loa e lē ua molia e sauni la te o i lana taavale.
Na agai muamua i Mulinuu ona toe agai ai lea o le la taavale i le fale o Pa‘u Sefo i Motootua ma maua ai loa le galuega a le tamaitai, ma le faaupuga e tatau ona sauni e amata i le 5 o le afiafi o le aso lava lea.
Sa manaomia ni laei o le tamaitai e faigaluega ai, ma faapea ai loa se faamatalaga a lē ua molia, o le a la o e sue mai ni laei.
Na agai le taavale i Aleisa ma ui atu ai i le alatele i Leulumoega-tuai ma faatūtū atu ai i le itu i Sisifo o Upolu seia oo ina taunuu i Apolima-uta ua lata i le afiafi. Sa agai loa le taavale i uta o le nofoaga ua ta‘ua o Olomanu lea e ui atu i se alatele o loo i Mulifanua.
Sa fesili le tamaitai na aafia poo fea o le a alu i ai le taavale, ae sa faaauau lava le faigamlaga.
Faaalia na tu le taavale i se vaega o le alatele e mamao i uta, ma oso ai loa i fafo lē ua molia ma tatala le faitotoa ma toso mai i fafo le tamaitai, ma taumafai loa e fai i ai se faigaaiga faamalosi.
Na ia saei laei o le tamaitai e pei ona faaalia e leoleo, ma o le avanoa na maua e lē na aafia na ia aaina ai lē ua molia ma mamulu ai loa.
Na tamoe televave mai i tai poo le mamao e tusa ma le 2 kilomita seia oo ina maua se aiga i lea vaega na sulufai i ai mo se fesoasoani.
I le molimau a le tamaitai, sa tau lē mafai ona faamatala ma tali i fesili ona sa tutulu.
O le mae‘a ona valaau molimau e toalima mai molimau e 11 a leoleo, na sosoo ai ma le toe faaauauina o le mataupu i le Aso Tofi, 21 o Oketopa 2010.
Peitai sa faailoa e le loia a Tuilagi, le afioga Maiava Visekota Peteru ua suia le tetee a lana itu, i le ioeina o le moliaga o le taumafai e faatino se faigaaiga faamalosi poo le attempted rape.
